Asturies acumula trés díes ensin finaos con COVID-19 per primer vegada dende ochobre

|
Vacunación de vecinos de menos de 75 años en Parque Astur

Esti xueves rexistráronse 126 casos nuevos, con una tasa de positividá diaria del 5,36 por cientu.

Ente'l 2 d'ochobre y el 5 d'ochobre, nel entamu de la segunda fola, enllazáronse 4 díes ensin fináu nengún con COVID-19 n'Asturies. Dende esi momentu'l país vivió una dramática acumulación de muertes, con payares como mes más prietu, que la llegada de la vacunación ta empezando a amenorgar de manera significativa.

Asina, ayeri rexistróse per primer vegada en seis meses trés xornaes siguíes ensin tener que llamentar perda nenguna. No que va d'abril finaron 25 persones, 5 nos 7 díes últimos, cuando en marzu a estes altures de mes llevábense 50 –cantidá qu'aumentaría a 87 el 31–.

A falta de la espublización de los datos oficiales de la COVID-19, la Conseyería de Salú informó de 126 contaxos ayeri –l'actualización contabiliza 2 menos por duplicaos del día anterior–. Son 29 menos que'l miércoles, cuando se detectaron 155.

El Serviciu de Salú del Principáu d'Asturies (SESPA) fixo 2.908 pruebes de diagnósticu d'infeición activa, polo que la tasa de positividá s'asitió nel 5,36 por cientu, inferior a la del día anterior, cuando quedó nun 6,11 por cientu. A 7 díes esti porcentaxe'l miércoles yera del 5,46 por cientu –ayeri xubió al 5,57 por cientu–.

Hai hospitalizaos 160 pacientes con confirmación o sospecha de COVID-19, 2 menos que la xornada anterior. A ellos hai que sumar otros 71 que tán na UCI, 1 más.

Na semeya, una muyer de menos de 75 años recibe ayeri la vacuna de la COVID-19 de Pfizer/BioNTech en Parque Astur, centru comercial de Corvera onde s'adaptó un espaciu como puntu de vacunación.

Contador Estadistiques