Astals gana a los críticos na Central Llechera Asturiana

La guerra ente'l sector críticu y el sector oficial pol control de la mayor empresa d'alimentación d'Asturies resolvióse ayeri a los puntos al favor del equipu oficial, col executivu catalán Pedro Astals al frente. La guerra ente'l sector críticu y el sector oficial pol control de la mayor empresa d'alimentación d'Asturies resolvióse ayeri a los puntos al favor del equipu oficial, col executivu catalán Pedro Astals al frente.

La Central Llechera Asturiana tenía que renovar ayeri a la metada de los miembros de la xunta rectora. Los oficialistes d'Astals ganaron, anque por un marxe pequeñu (79 votos contra 68) a los socios críticos de l'Agrupación Independiente de Ganaderos. El trunfu d'Astals déxa-y el camín esfaltáu pa siguir al frente de Corporación Alimentaria Peñasanta, casa matriz de CLAS a la que l'executivu catalán llegó en 1996 col encargu d'iguar la crisis financiera de lo que yera una cooperativa de ganaderos, pero la historia de la Central Llechera, qu'ayeri vivió por primer vegada una votación con dos candidatures distintes a presidir la xunta rectora, bien merez un repasu.

La Central Llechera Asturiana tuvo una evolución bien curiosa dende la so creación a últimos de los años 60. Foi entós cuando na Cámara Sindical Agraria d'Asturies, y más en concreto dende la persona de Jesús Sáenz de Miera, d'aquella presidente de la Cámara, guañó un ambiciosu proyectu agroalimentariu empobináu a cortar pela freba colla guerra de precios qu'enfrentaba a ganaderos y industriales llecheros allá pel añu 1966. El resultáu foi l'andecha de 4.200 ganaderos xuníos y la concesión estatal d'una central llechera nel añu 1968. Nel añu 1970 inauguráronse en Granda les instalaciones de la empresa, con una inversión de 150 millones de les antigues pesetes y una plantiya más de 150 trabayadores. La tecnoloxía importao d'Holanda y la presencia del mozu técnicu francés Lucien Poncet foron los primeros avales de la empresa. Esti profesional francés foi'l que implantó un novedosu y modernu procesu productivu na compañía asturiana, faciendo de la calidá del lleche l'exe de la Central Llechera. CLAS foi de les primeres n'envasar el lleche estéril en botella de plásticu non retornable nos 70, mientres qu'un alcuerdu con Yoplait fizo posible entrar al mercáu del yogur, al mesmu tiempu que se creaba una rede de distribución propia

Los 80, periodu de cambeos nel mercáu, y entamu de la reconversión ganadera n'Asturies cola entrada na CEE nel 86, revolvieron los pegoyos en que se tenía la empresa. Col entamu de los 90 lasituación yá ye de crisis abierta, y un informe de l'antigua Arthur Andersen nel 1991 alvirtió de graves defectos na xestión de CLAS. La consultora apuntaba a los altos costes salariales, la ineficiente figura xurídica que tien la empresa, que daquella yera una SAT (sociedá agraria de tresformación) y dicía qu'había que profesionalizar la cúpula directiva. Darréu d'ello apaez el catalán Pedro Astals, directivu catalán con una importante esperiencia nel sector industrial agroalimentariu en Cataluña y que desembarcó n'Asturies como fichaxe d'oru del vieyu presidente de CLAS Jesús Sáenz de Miera.

A últimos del 96 Pedro Astals, como Director Xeneral, reorganiza la empresa estratéxicamente con un nuevu diseñu: la que yera la sat dixébrase en dos sociedaes, una pa piensos y otra pa llácteos. Xunta esto róblase una importante alianza cola francesa Bongrain y con delles cooperatives agraries. Ta acabante de ñacer CAPSA: Corporación Alimentaria Peñasanta S.A. Nel añu 1997 CLAS fusiónase con Iberlat, faciéndose asina la primer compañía española del sector en competencia col grupu Pascual. Al mesmu tiempu, Astals entamó una política de marketing mui efectiva basada en dar imaxe de calidá más que na competencia en en precios. La diversificación de la empresa xunta l'espardimientu de la rede de distribución ficieron posible que la Central Llechera mandare nun mercáu maduru y con pequeños marxes de beneficu como'l del lleche.

Pero los cambeos qu'entamó'l directivu estrella nun-yos prestaron, nin con muncho, a tolos miembros de CLAS. Los ganaderos víen como se perdía l'orixe de la compañía sofitáu nunes relaciones casi familiares, y los socios fundadores de la sociedá y los socios ganaderos víen como perdíen poder y capacidá de decisión con cada decisión d'Astals, que dende CAPSA facía y desfacía en CLAS. D'otra manera,con Astals la xestión entamó a basase nel marketing y n'estratexies propies de grandes empreses dexando a un lláu el calter de l'antigua sociedá agraria de transformación.

Estes diferencies ente'l agora cabezaleru de CAPSA, Pedro Astals, y parte de los ganaderos de la central lechera ficiéronse visibles otra vegada nel procesu electoral pa escoyer el nuevu gobiernu de CLAS. Los críticos a la xestión de Pedro Astals presentábensese a les elecciones a la Xunta Rectora y a la Comisión de Control de CLAS. Mentantu Pedro Astals propón un nuevu cambéu: dixebrar la dirección de CAPSA y de CLAS pa facilitar la xestión d'ambes. Con ello Astals dexaba de ser el xerente de CLAS y centraríase dafechu na dirección de CAPSA. El presidente de dambes siguiría siendo el fundador Jesús Sáenz de Miera. Pero'l sector críticu pidía más poder pa CLAS, dixebrando les presidencies de dambes compañíes pero dándo-y más independencia na xestión en CLAS respective a CAPSA. Los críticos a Astals denuncien tamién que la compañía ta metiéndose en deldes ensin xacíu. Les postures d'Astals y los críticos taben cada vegada más lloñe d'un alcuerdu, y los resultaos de la votación d'ayeri diéron-y el trunfu, pesllando, polo menos de momentu, la llucha pol control de la empresa.