Asoléyense los estatutos nuevos de l'ALLA

|
Llar de l'Academia de la Llingua Asturiana (ALLA) puerta

La Conseyería de Facienda espublizólos nel BOPA, que sustitúin a los del 1995.

"Pasaos venticinco años dende la postrer modificación de los estatutos de l’Academia, resulta pertinente la so adaptación tanto a la evolución social, normativa y educativa de la llingua asturiana nes últimes décades como a les propies necesidaes organizatives y de funcionamientu d’aquella, adecuando amás el testu a un llinguaxe non sexista", esplícase nel preámbulu del decretu que modifica los estatutos de la insititución. Éstos enantes d'aprobase en Conseyu de Gobiernu, recibieren el preste del Plenu de la Xunta de Gobiernu de l'Academia de la Llingua Asturiana (ALLA).

Nun hai cambios significativos nel testu nuevu con respeuto al anterior. Ente les modificaciones principales ta, nel Títulu 1, dedicar l'artículu 1 a definir el 'Calter y réxime xurídicu', pasando los 'Fines y llabores' al 2.

Asina, rescámplase en primer llugar que "los sos fines son la codificación, normativización y estandarización de la llingua asturiana", pa depués, nel puntu 2, enumerar los llabores yá marcaos nel 1995, cola novedá d'incorporar nel correspondiente al gallego-asturiano la esistencia de la Secretaría Llingüística del Navia-Eo, la institución que "contribuyirá a la estandarización y normalización d'esta llingua". Tamién s'afita'l llar nuevu nel monasteriu de Les Pelayes, na cai L'Águila númberu 10.

Nel restu de títulos adáptense delles cuestiones p'actualizar la redaición al tiempu actual, como ye'l casu de camudar el nome del II, que pasa 'De los miembros' a 'De los académicos y académiques', asina como clarificar dellos aspeutos en cuestiones como la tresparencia o la financiación de la institución.

Contador Estadistiques