ASMA y el Centru Asturianu de Madrid firmen la paz

El Centru Asturianu de Madrid desenterró va dos meses l'hachu de guerra al rexistrar llegalmente como propia la marca "Asturianos en Madrid - ASMA" nome col que, dende l'añu 2.000, funciona en madrid un garapiellu d'emigrantes asturianos na capital, los más d'ellos xente mozo, que crearon esta asociación como una entidá cultural y recreativa y como una ferramienta práctica pa organizar los viaxes ente Asturies y Madrid de los sos socios, qu'aprovechaben pa quedar ente ellos y facer el trayectu delles persones nun mesmu coche y asina aforrar gastos de desplazamientu.

El Centru Asturianu de Madrid percibió la esistencia d'ASMA como una amenaza a la representatividá de la comunidá asturiana que tien la entidá que dirixe Cosme Sordo, y,anque de mano llegaron a facer dalguna actividá conxunta, la rellación enfríose bien llueu, llegando a un puntu que yá nun tenía vuelta cuando'l Centru Asturianu rexistró la marca "ASMA" cola que venía trabayando l'otru grupu.

A tanto llegó l'enfrentamientu que'l Conseyeru de Xusticia y l'Axencia Asturiana de la Emigración decidieron metese pel medio p'apautar una solución y que dambes entidaes s'amigaren.

Como resultáu d'esta negociación que dende l'Axencia d'emigración definen como llarga y difícil, precisándose delles reuniones por separao con cada parte interesada, esta selmana hebo un alcuentru na Oficina de representación d'Asturies en Madrid con representantes de les dos partes interesaes na que'l Centru y ASMA ficieron les paces, comprometiéndose'l Centru que dirixe Cosme Sordo a retirar el rexistru del nome d'ASMA y aveniéndose dambes partes a trabayar conxuntamente nuna rellación que va ser de cooperación ente dambos organismos.

Anque la crisis alcontró una salida, l'episodiu punxo en primer planu la esistencia d'una nueva realidá na emigración asturiana más moza que dacuando concasa mal cola dinámica y los intereses d'otru colectivu d'emigrantes que tienen más tiempu.

Ello ye qu'ASMA, anque ye una asociación llegalmente constituyida y con más de 900 socios, nun tien derechu a recibir les mesmes ayudes que'l centru asturianu, en cuantes que namás una entidá por cada ciudá tien derechu al reconocimientu nel rexistru d'asturianía y nel casu de Madrid el Centru Asturianu yá taba muncho primero, anque les actividaes d'ASMA cuenta puedan contar con respaldos dende l'alministración asturiana.

Luis Miguel Fernández Romero, director de l'Axencia Asturiana de la Emigración espresó la voluntá del departamentu que dirixe de que concueyen los intereses de toles entidaes que representen a los asturianos na diáspora, lo mesmo centros asturianos qu'entidaes como ASMA, que son dalgo "más amplio" qu'un centru asturianu al usu.