Areces en Nueva York

La visita del presidente asturianu a Nueva York xunta la Fundación Príncipe d'Asturies ta dando pa más d'una anécdota curiosa. Ello ye que'l presidente, como bon asturianu, fizo de patriota en viéndose fuera de casa. Sábese que los asturianos somos daos a nun exercer l'arguyu de la tierra cuando tamos a esti llau del cordal, pero lo cierto ye que en pasando'l puertu o en cruzando'l charcu el calter asturianu pierde tola capacidá d'autocrítica y vuélvese un patriota dacuando furibundu.

Ensin llegar a talos estremos, el Presidente asturianu Álvarez Areces mostró delles pildoraes d'un desconocíu asturianismu na so visita a Nueva York. Areces, vendiendo los atractivos de la patria, esplicó-yos a los neoyorquinos qu'Asturies ye "territoriu d'au salió la Reconquista cristiana contra los musulmanes" . Entovía más, el presidente, que participaba nun actu oficial destináu a promocionar la imaxe d'asturies, esplicó que "los asturianos tenemos una llingua propia, la llingua asturiana o bable".

Na semeya qu'acompaña a esta información reproducimos la imaxe (nun ta probao que seya auténtica) que nos mandaron dende Nueva York el 11 de setiembre del 2.001.