Areces diz que los presupuestos negóciense con cada conseyería y non con IU

Sigue'l pulsu ente los socios de gobiernu polos presupuestos asturianos pal 2005. Dempués de la crítica de Valledor a l'anuncia del Conseyeru de Facienda de que los presupuestos "yá taben pesllaos" el Presidente asturianu declaró esta mañana en rueda de prensa que los presupuestos "siguen negociándose" y esclarió que la negociación faise "nel conxuntu del gobiernu" atendiendo a les piticiones de cada conseyería y que la negociación presupuestaria "nun ye una negociación con IU". Areces dixo que los presuestos van pesllase en pocos díes y cuida que "van dexar contentes a les dos formaciones polítiques en gobiernu".

Areces dixo que'l presupuestu nun va perpasar los topes de capacidá financiera d'Asturies, colo que dio a entender que la xuba presupuestaria nun va pasar del 6,7% respective a los del 2004 y que tampoco nun va atender la demanda d'IU de francer col "déficit cero" y facer una política más atrevida d'endeldamientu

Areces fizo estes declaraciones mientres participaba nos alcuentros sobre "Política Social de Rentes Mínimes y Incorporación Social", un asuntu mui allegáu al asuntu del Salariu Social previstu nel pautu de gobiernu de va un añu y qi'entovía ta pendiente de desarrollu al traviés d'una llei específica. Areces prometió esta llei pal 2005 y defendió la oportunidá del Salariu Social como ferramienta que torgue la esistencia de "families que tengan una grave desestructuración y que nun tengan posibilidaes d'inserción" a les que "la sociedá tien obligación d'atender y procurar que salgan d'esi estáu" .