Areces despide l'añu cantando pela TV

La Conseyería de la Presidencia del Principáu dio anuncia ayeri d'un orixinal proyectu solidariu pa recaudar fondos con destín a l'ayuda internacional. Ello ye que los Miembros del executivu asturianu y dellos diputaos de la Xunta Xeneral participaron estos díes na grabación d'una gala benéfica que va emitise esta nuechevieya pela canal de TV Teleasturias, en cuantes que la canal autonómica entovía nun ta en condiciones d'echar a andar. Na gala especial, vamos poder ver a políticos como José Ángel Fernández Villa interpretando grandes clásicos de la canción ayerana, o al mismísimu Tini Areces faciendo una versión de Cliff Richard. El presidente tamién tien dos duos, ún col líder del SOMA-UXT y l'otru con Francisco Valledor, interpretando col primeru'l un célebre tema de "Pimpinela" y el "Felicitá" d'Al Bano y Romina Power col conseyeru de Xusticia. Pela so parte, Villa, Valledor, la diputada d'IU Noemí Martín y la diputada del PSOE María Luisa Carcedo atrévense los cuatro col "Waterloo" d'ABBA, anque quiciás llamé más l'atención la presencia de l'alcaldesa de Xixón Paz Felgueroso faciendo una versión de Nana Mouskouri, ello nun momentu en que les rellaciones ente l'alcaldía de Xixón y el Principáu nun anden mui p'allá a cuenta del casu de l'alxudicación del casinu na villa de Xovellanos. Falando de males rellaciones, según esplicaron dende la Conseyería, intentóse qu'Ovidio Sánchez grabare tamién un tema, pero dende la dirección del PP ñegáronse dafechu a que naide del partíu participare nel proyectu. Fontes del PP dicen qu'ello foi porque saben seguro que les perres que se recauden col proyectu del discu van dir toes pa sofitar la dictadura comunista de Fidel Castro.

Ello ye que la grabación del programa quedó tan curiosa que la Conseyería va asoleyar les participaciones musicales nun doble CD que va salir a les baldes de los supermercaos coincidiendo coles rebaxes de xineru. Nun llabor d'investigación que nos llevó a baxar a los suétanos de la industria del "top manta" pudimos facenos con una carátula del discu, que pue descargase equí.