Arbón va salvar la veiga

La polémica pola construcción de la carretera de la variante d'Arbón, qu'amenazaba con estrapallar la tierra de la vega d'esti valle de Villayón ta acabante de pesllase, parez qu'esta vegada yá de manera definitiva, al favor de los vecinos, contrarios a la construcción de la carretera nueva y que pedín una meyora de la carretera qu'hai anguaño

El pueblu d'Arbón tenía hasta agora una guerra particular contra'l Gobiernu asturianu, que quería que pasare pel medio de la Veiga d'Arbón una variante de la carretera AS-25 (Navia - Villayón) que francería la veiga en dos cachos, pasando xusto pela parte onde ta la meyor tierra de llabor y esfarraplando'l patrimoniu del llugar .

El tramu de la polémica, de cerca de 3 kilómetros, yera l'únicu que faltaba pa rematar la obra de carretera, pero l'asociación de vecinos y el propiu Ayuntamientu nun-y veíen xustificación en cuantes que la variante nun suponía meyora na comunicación del interior cola costa, como ellos mesmos demostraben nun estudiu de tiempos y distancies sobre'l proyectu.

Laincreible historia d'esta obra arranca en 1996, cuando la obra quedó emplantasmada. Anque la xente d'Arbón consiguió demostrar en 1998 que la variante nun yera lo más conveniente, llogrando que se modificare'l proyectu, en setiembre de 2001 el Principáu volvió cola idea de facer la carretera pel medio la veiga. El Gobiernu asturianu foi poco a poco reculando d'aquella posición, y yá n'agostu del 2.002 el secretariu de política municipal de la FSA-PSOE Fernando Lastra dixo nuna entrevista qu'acabaría por imponese "el sentíu común" nesti asuntu, faciéndose la obra d'alcuerdu colos vecinos. A dos meses de les elecciones, esa promesa parez que yá ye realidá.