Aplazáu' l campeonatu de bandes de Gaites

Asturies.com púnxose en contacto cola FIGA pa saber les
razones del aplazamientu del Campeonatu Nacional de Bandes de Gaites, y pa que
feches ta previstu.



José Luis García presidente de la FIGA (Federación
Internacional de Gaiteros Asturianos) comentó a esti diariu que la
dificultá que teníen dos bandes de poder participar nel
campeonatu na fecha prevista del 26 d'ochobre, fizo que la organización
del campeonatu decidiera aplazalu. José Luis Garcia argumentó
que'l númberu de bandes que s'apunten al campeonatu nun ye mui altu,
colo que ye importante facilitar y posibilitar la participación de toles
bandes que quieren participar d'esta iniciativa buscando una fecha que venga
bien a toes les bandes. Les razones poles que nun pueden participar estes dos
bandes son diferentes, a una banda-y coincide con una actuación fuera
d'Asturies, pa la otra banda, la propia dificultá d'organización
y económica que representa pa una banda como ye
"La Tayuela de Mecer" de Madrid
participar nel campeonatu, fai que tengan qu'esperar a un momentu más
adecuáu pa poder venir a Asturies a participar nel campeonatu.



Les feches que ta valorando la FIGA pa facer el campeonatu van dende
primeros d'avientu d'esti añu hasta la primavera de 2004. Como
novedá pa esti añu José Luis García comentó
a Asturies.com que va grabáse un cd coles actuaciones del campeonatu.
Amás tamién adelantó qu'hai la posibilidá de que
nel xuráu haya dalgún asturianu, y nun tea compuestu enteramente
por xuraos gallegos. Nos demás aspectos del campeonatu
mantiénense les normes d'años pasaos. En pocos díes vamos
poder davos dende esti diariu la fecha exacta del campeonatu.