Apaez un cargamentu de chatarra radioactivo en Xixón

La Unidá Técnica de
Protección Radiolóxica contratada pol Conseyu de Seguridá
Nuclear a la empresa PROINSA, encargada de facer controles pal CSN,
atopó esti llunes radioactividá na carga d'un camión con
chatarra de la empresa de Xixón
Daniel González
Riestra, siendo esta chatarra parte d'un cargamentu d'ente 150 y 200
tonelaes de chatarra radioactivo, d'orixe desconocíu, según la
empresa.



Al dicir de la conceyala de Xixón Dulce Gallego y de la responsable de
la Viceconseyera de Mediu Ambiente y Ordenación del Territoriu,
Belén Fernández, que s'entrevistaron con representantes del CSN y
de la Empresa Nacional de Residuos Radiactivos, la chatarra nun ye peligroso, y
yá ta separtao de lo otro y tapao con mantes pa depués da-y el
tratamientu conveniente. Nesti sentíu anunciose que va facese un plan
detallao de descontaminación y recuperación de la maquinaria que
tuvo contactu cola chatarra y de la chatarra mesmo. Los responsables del CSN
aseguraron qu'analizaron la ropa de trabayar de los emplegaos de la empresa
ensin dar nello con restos de contaminación, y dixeron qu'agora tan
faciéndo-yos análisis a los propios operarios pa mayor
seguranza.



La empresa Daniel González Riestra S.L., que dixo desconocer
l'orixe del cargamentu de chatarra contaminao, ye una de les más
antigües chatarreres d'Asturies. Fundada en 1950 en Llangréu,
treslladose 1982 a Montevil en Xixón, hasta que la urbanización
del barriu de Montevil obligó a treslladar otra vuelta la empresa hasta
les instalaciones d'anguaño, en San Andrés, xunta la
fábrica d'Arcelor (antigua Ensidesa), onde s'especializó en
recuperaciones lo mesmo de materiales férricos que d'otres clases.