Anuariu y diez años de L'Aguañaz

El vienres pela mañana presentóse l'Anuariu de la Música Asturiana y el cd que celebren de 10 años de vida de la discográfica "L'Aguañaz".

Anque la presentación quedo en parte eclipsada pola anuncia de la creación de la categoría al meyor cantar n'asturianu, inda quedó tiempu pa falar d'estes dos novedaes de la música asturiana. Primero presentóse'l que yá ye'l cuartu anuariu de la música asturiana editáu por "L'Aguañaz". Esta revista ye un repás a lo pasó na música asturiana l'añu qu'acaba, amás de sirvir tamién de soporte p'artículos que dan una idea de cuál foi'l pasáu de la nuesa música y que posibilidaes de futuru hai. Un artículu sobre la tonada de Pablo Antón Marín, una entrevista a Anabel Santiago, un par d'ensayos d'Adolfo Camilo y Ismael González Arias sobre la situación de la música asturiana y los caminos o estratexes que puen tomáse pal so espoxigue son un exemplu. Tamién hai otros artículos que falen de distintos aspectos de la música asturiana como son los de Xune Elipe que fala del rock asturiano o Rubén Arias que da una visión más xeneral de los diferentes actores qu'operen na escena musical asturiana. Tamién na sección collecha topamos un pequeñu dossier que quier recoyer y comentar toles publicaciones rellacionaes cola música asturiana d'aguaño, bien seyan discos, llibros o videos.

Un clásicu d'estos anuarios ye la sección d'humor que suel tar ocupada por dalguna creación de Ruma Barbero. Esta vegada'l percusionista de "Felpeyu" y "Ciquitrinos" alióse con Antón García, Eddie Wood y Jorge A. Cachero pa sacar la que probablemente seya la primer fotonovela n'asturianu. Nesta fotonovela los protagonistes son los componentes de los "Ciquitrinos", y nella cuéntasenos la "tráxica historia" que llevó a caún de los músicos a formar esta banda. En resume 90 páxines sobre música asturiana bien interesantes.

Na presentación tamién se faló de la última novedá discográfica de "L'Aguañaz", el compilatoriu "10 años d'independencia" que celebra 10 años d'esistencia de la discográfica. D'esti discu falaremos ma´s posao la selmana qu'entra.