Antón García recibe'l premiu de la Tertulia Malory al meyor llibru n'asturianu del 2019

|
Cubierta de 'Memoria de Tuña' d'Antón García recortada

'Memoria de Tuña' foi'l títulu escoyíu pol xuráu del gallardón creáu nel 2012.

La situación sanitaria pola pandemia de la COVID-19 obligó a retrasar la entrega del premiu de la Tertulia Malory al meyor llibru n'asturianu espublizáu nel añu 2019, falláu nel mes de setiembre. El so autor Antón García, actual direutor xeneral de Política Llingüística, va poder recibir la ilustración d'Alfonso Zapico y la medaya conmemorativa nun actu que va tener nel Tom Malory de L'Entregu, chigre qu'acueye esta tertulia, a les 17.30 hores d'esta tarde.

Los escritores Xulio Arbesú, José Luis Rendueles, Solinca Turbón, Pablo Rodríguez Medina, Roberto Corte, Aique Fernandi, Chechu García y Henrique G. Facuriella encargáronse de la escoyeta de la obra merecedora del gallardón, decidiendo por mayoría que yera 'Memoria de Tuña' (Saltadera). "La novela guarda una unidá tonal; nella l’autor ye quién a construir, a partir de la señaldá y el sentimientu, un universu simbólicu, onde, con emoción controlada, facer un homenaxe al pueblu, la familia, la infancia y la tradición", rescampla l'acta del xuráu, que reconoció amás la calidá de la producción lliteraria n’asturianu del añu 2019.

García incorpórase asina a la llista d'ocho autores que recoyeron esti reconocimientu que da dende'l 2012 esta tertulia nacida nel n'ochobre del 1998 a partir d'un grupu d'escritores que s'axuntó nos talleres lliterarios que punxo'l profesor Benigno Delmiro na biblioteca de L’Entregu col oxetivu de falar y aldericar sobre llibros y lliteratura la tertulia. Ésta ta compuesta por Xabiero Cayarga, por ‘La neve del cuquiellu’ (2011); Ruma Barbero, por ‘La Chelita’ (2012); Milio Rodríguez Cueto, por ‘Carne de melandru’ (2013); Consuelo Vega, por 'Más espeso que l'agua' (2014); Ángeles Carbajal, por 'L'aire ente la rama' (2015); Francisco 'Paco' Álvarez, por 'Lluvia d'agostu' (2016); Raquel F. Menéndez, por 'El llibru póstumu de Sherezade' (2017); y David Artime, por 'Incorrectos' (2018).

Con esti premiu los sos entamadores quieren prestixar les lletres asturianes, al empar que se da difusión a les obres que, a criteriu del xuráu, sían consideraes los meyores llibros escritos l'añu anterior n’asturianu.

 

Contador Estadistiques