Andecha Astur diz ser víctima d'una campaña de criminalización

La organización política
Andecha Astur convocó esta mañana una rueda de prensa en
rempuesta a les informaciones apaecíes en dalgún mediu asturianu
qu'apuntaben al "entornu d'Andecha Astur" como l'ambitu au la guardia
civil investigaba los posibles autores de los atentaos d'esti fin de selmana a
les sedes d'IX en Xixón, del PP en Sotrondio y del PSOE en
Piloña.



Na rueda de prensa, los representantes d'Andecha Astur, Ezequiel
Sánchez y David Rivas lleeron un comunicáu en que la
organización manifiesta que, en cuantes qu'organización
política, toles sos actividaes desarróllense dientro de la
llegalidá, refugando "cualquier otru camín que nun
fuere'l de l'acción política". Andecha denunció
que tales informaciones "suponen una intencionada campaña de
criminalización de la única fuerza que fai una oposición
política rial n'Asturies" y del nacionalismu asturianu,
sobremanera cuando fechos más graves al paecer d'Andecha, nun tovieron
el seguimientu informativu que tovieron los socesos
d'esti fin de selmana, de los que se desvincula dafechu y ensin paliativos.
Andecha Astur estráñase tamién de la coincidencia de los
ataques que la organización sufre nos medios de comunicación cola
medría que'l partíu vien esperimentando d'un tiempu p'acá. Dientro de la campaña de criminalización que taría sofriendo, la organización nacionalista atalanta que tan recurriéndose a técniques de manipulación que faen por llevar a la sociedá asturiana un ambiente de conflictu que nuntien que ver cola realidá social.




Andecha Astur, qu'anuncia que va continuar cola so llinia política ensin
dexase condicionar por otres circunstancies, anunció que tien
intención d'entamar acciones llegales pa torgar la difamación de
la organización. El comunicáu acaba llamentando los actos
violentos de la fin de selmana, anque culpa a PSOE, PP y IU de
"condergar a Asturies a una situación
predemocrática" y que "favorez cola so
testonería y falta de sentíu democrática rempuestes que
toos llamentamos"