Anabel Santiago quier traer un públicu más mozu a la tonada

La casina Anabel Santiago presenta esti xueves 20 en Teatru Xovellanos de Xixón el so últimu discu nel que-y fai homenaxe a la veterana cantante Diamantina Rodríguez nun conciertu nel que tamién va interpretar dalguna pieza inédita y nel que la mesma Diamantina va xubir al escenariu a acompañar a una de les voces con más futuru de la canción asturiana.

Nesti trabayu que s'asoleyó apocayá, Anabel canta los temes que nel so día ficieren popular el nome de Diamantina Rodríguez ente los aficionaos al xéneru de la canción asturiana pero llevándolos a una tesitura musical distinta, con un gran protagonismu de les igües y cola collaboración d'otros músicos. Cola producción de Michael Lee Wolfe, que va tar esta tarde con ella nes tables del Xovellanos, el discu afonda tamién na llinia abierta xunto con otros artistes de fusión ente la tradición asturiana y el jazz gracies a l'aportación de músicos como'l pianista Jacobo de Miguel.


Na presentación del recital que va ufiertar esta tarde (20:30 h) nel teatru de Xixón, l'artista reivindicó la so trayectoria musical como un intentu por remocicar el xéneru de la canción asturiana y averar al mesmu a un públicu más mozu, tanto polo tratamientu musical como pola renovación nes lletres, que traten temes que francen cola estética tradicional del xéneru.