Ana Pereira da una vida nueva a la mitoloxía asturiana na novela cómica ‘Bederre’

La ganadora del III Premiu Radagast de Fantasía, Ciencia Ficción y Terror cola obra ‘Cuntaora’ ta acabante d’asoleyar la so primer novela, precisamente con esta editorial. Ye ‘Bederre’, una novela cómica sobre la mitoloxía asturiana, a la qu’Ana Pereira da una vida nueva treslladándola a los nuesos díes “fuxendo del drama y la seriedá”.

“A piques de casar ensin demasiaes ganes con una ‘piḥa’, Elu, el protagonista, recibe una llamada de la güela comunicándo-y que’l güelu morrió. Al llegar al pueblu descubre que ta más vivu que nunca y que too yera una ‘broma’. Lentamente, y col pasar de los díes en pueblu, asitiáu nel Parque Natural de Redes, Elu va decatándose de dellos comportamientos estraños, que yá nun recordaba, y que poco a poco va dir venceyando a los personaxes mitolóxicos que toos conocemos como los trasgos, les xanes, los homones o los nuberos”, apunten dende Radagast sobre la historia.

Un llibru nel que “con prosa áxil y muncha retranca, Ana Pereira fai una parodia de la mitoloxía asturiana tal y como la enseñen na escuela y da-y una nueva vida, fuxendo del drama y la seriedá y emplegándola como material de construcción d’una novela mui bien filvanada y con munchu humor”. ‘Bederre’ cuenta amás con ilustraciones ellaboraes pola autora, “que van dando más vida a los estremaos personaxes y capítulos”.

Esti llibru ye la primer novela d’esta sotrondina del 1978, que va ver pronto espublizada tamién ‘Cuntaora’, cola que ganó’l III Premiu Radagast. Dende la editorial rescamplen que Pereira “ye la segunda novelista que debuta con Radagast”, depués de Blanca Fernández.

Presentaciones n’avientu

Tán programaes trés presentaciones n’avientu pa dar a conocer ‘Bederre’. La primera va ser el día 9 a les 17 hores nel Muséu de l’Apicultura de Tanes, a la que va siguir otra’l 15 na Casa La Buelga de Ciañu y una tercera’l 19 nel Centru d’Innovación y Desendolcu del Altu Nalón (CIDAN) de La Pola Llaviana.