AMA Asturies abre alderique "por un feminismu pa toes y toos"

|
Cartelu II Escuela de Pensamientu Feminista d'AMA Asturies

Entama en Xixón la segunda edición de la Escuela de Pensamientu Feminista.

Depués de la bona esperiencia del añu pasáu, celebrada de manera telemática, l'Asamblea Moza d'Asturies (AMA) apuesta esti añu pola presencialidá. Nes munches intervenciones previstes ente mañana y el domingu na pista polideportiva de Cimavilla, en Xixón, va aldericase sobre l'allianza con otros movimientos y lluches sociales pa la conquista de derechos pa toes y toos, sobre la interrellación de los diferentes tipos de violencies y de les respuestes feministes que se pueden articular más allá del castigu, de los alcuentros ente la llucha trans y la feminista, d'una sexualidad pa la llibertá, de la crisis de reproducción social nel marco neolliberal y les fuelgues feministes globales como ferramient pa superala, y de la masculinidá y el papel de los homes como pieza fundamental pa una tresformación social en clave feminista.

Ente les convidaes pa la Escuela de Pensamientu Feminista hai referentes importantes del feminismu a nivel estatal y inclusive internacional, como Paloma Uría, Jara Cosculluela, Justa Montero, Lucía Fernández, Carolina Elías, Pamela Palenciano, Clara Serra, Josetxu Riviere, Verónica Gago, Julia Cámara, Laura Macaya, Pastora Filigrana y María Rodríguez. Uría y Cosculluela van encargase d'abrir les actividaes mañana a les 17.15 hores, que van siguir el sábadu y na mañana del domingu, con entrada llibre hasta completar aforu y la posibilidá de siguir les intervenciones al traviés de les redes sociales d'AMA Asturies.

Nun dexar a naide fuera

"La nuesa escuela ye una apuesta por un feminismu pa toes y toos, que nun dexe a naide fuera y que nos aúne polo que queremos construyir y non tanto por quiénes somos. Apostamos por un feminismu que defenda la pluralidá, el disentimientu, les diferentes corrientes feministes, les teoríes queer y otres aportaciones como dalgo arriquecedor sobre lo que dialogar y aldericar, y qu'entiende la potencia feminista como un movimientu emancipador pa tola sociedá", apunten les organizadores, que se presenten como una alternativa más abierta a la otra escuela feminista que s'entama en Xixón, la Rosario de Acuña, por iniciativa de los Servicio de Polítiques d'Igualdá del Conceyu.

Contador Estadistiques