Alsa puya pola xestión d'estaciones en Chile

Les empreses Alsa y Agbar crearon el consorciu chilenu Estaciones Metropolitanas col oxetivu d´algamar los contratos de xestión de les estaciones intermodales de Chile. La compañía asturiana de tresportes Alsa y la filial d'Aguas de Barcelona, Agbar, tienen bien d'interés en construyir y xestionar estaciones intermodales en Santiago de Chile. El consorciu empobináu poles dos empreses ta acabante de presentar la única ufierta al Ministeriu d´Obres Públiques (MOP) chilenu pa les estaciones d'intercambiu modal de Quinta Normal y La Cisterna. Según la Coordinación Xeneral de Concesiones del MOP esti ye'l primer pasu pa modernizar el serviciu de tresporte públicu del Gran Santiago. Asinamesmo xustifiquen dende l'alministración que la presentación d'una única ufierta ye pola complexidá del proyeutu y los curtios plazos que se dan.

Les inversiones que prevén dende´l consorciu lideráu por Alsa son de cerca de 56 millones de dólares. Esti presupuestu va sofitar la creación de dos estaciones intermodales na capital chilena: les estaciones de Quinta Normal y de La Cisterna. La primer estación tien presupuestaos 33 millones de dólares mentantu que na segunda van invertise 23. Dientro del proyeutu inclúyese la creación de zones comerciales y servicios públicos. Según delles estimaciones, estes estaciones van mover cerca de 53 millones de pasaxeros al añu. El consorciu va xestionar la infraestructura y los equipamientos, la vixilancia y seguranza, los servicios de llimpieza, d'información al públicu y la xestión integral. Tamién tendrá la oportunidá de xestionar servicios complementarios como la pubilicidá, servicios comerciales o l'estacionamientu.

Chile ye un mercáu estratéxicu pa la empresa Alsa, onde ya tien una perimportante presencia cola xestión del tresporte públicu de la capital chilena y cola alquisición l'añu pasáu de la mayoría del capital de la empresa de tresporte interurbanu LIT. La filial chilena de la empresa asturiana cuenta con ampliar capital por valor de 6,7 millones de dólares pa sofitar la financiación de la compra total de les empreses chilenes onde tien participaciones y entamar nueves llinies a Perú y Arxentina.