ALSA merca´l 20% de la franquicia de tintoreríes Pressto

La empresa de tresportes asturiana entró nel accionariáu de la cadena de tintoreríes franquiciaes Pressto mercando el 20% de la compañía a traviés d´una ampliación de capital, quedandoel 80% restante en manes de los tres fsocios fundadores undadores de la empresa. L' oxetivu de Pressto ye tener un encontu en que sofitase pa espardese nel mundiu. La cadena de tintoreríes tien anguaño penriba les 650 franquicies con presencia en China, Reinu Xuníu, Israel, Bulgaria, Colombia, Venezuela, Costa Rica, República Dominicana, Malta, Perú, Marruecos, Portugal, Venezuela, Estaos Xuníos y España, y ente los sos planes ta el llegar les 2.000 franquicies de tintorería y metese pel mercáu brasileñu. La facturación de la franquicia el añu pasáu foi de 90,5 millones d´euros, lo que supón un crecimientu del 11,7% respeutu al añu anterior. El 30% del negociu de la empresa de tintoreríes tien orixe nos mercaos internacionales.



Les relaciones ente Alsa y Pressto vien de vieyo en cuantes que les dos empreses entamaron a collaborar cuando la franquicia entró nel mercáu chinu gracies a l´ayuda de la empresa asturiana. La entrada d´Alsa nel accionariáu enxértase na estratexa de la empresa asturiana de diversificase, pero tamién tien que ver col interés que tien ALSA por dir desapegándose de los sos orixes nel tresporte de viaxeros. Ello ye qu'anguaño'l tresporte de viaxeros ya nun ye una actividá tan rentable pal grupu, y el negociu de la carretera ta dándo-yos problemes a la familia Cosmen, que se quexa lo mesmo de los problemes de rellaciones llaborales que de los estrenchos marxes de beneficiu qu'apure anguaño'l negociu de los autocares. El que l'otru veranu cayere de vieya la histórica estación d'autocares de la compañía en Xixón val de simbólica metáfora del precuru que-y dediquen anguaño los Cosmen a lo que foi el guañu de la compañía. Otramiente, Pressto necesita d'inversores como ALSA p'atechase del bastiazu financieru que ta cayendo enriba'l negociu de les franquicies, que ven como los bancos-yos nieguen tolos creditos que-yos piden.