Alonso va salir el 8 en Cataluña

El pilotu asturianu de Fórmula 1 Fernando Alonso consiguió l'octavu meyor tiempu nos entrenos oficiales del Gran Premiu d'España, quinta preba del Mundial que se disputa mañana en circuitu catalán de Montmeló. La pole foi pal alemán de Ferrari Michael Schumacher, que tuvo sobráu de coche pa marcar el meyor tiempu.

Alonso, que fizo la vuelta definitiva énte más de 75.000 espectadores, 3.000 d'ellos asturianos, paró los númberos del cronómetru en 1:16.422, pero según dixo ello nun foi tolo bueno que pudiere. Según Alonso, l'aire frenolu en delles partes del circuitu. Ello ye qu'esti tiempu dexalu n'octava plaza de la parrilla, lloñe del tercer puestu que ficiere nel 2.003 y amás va obligalu a salir pela parte puerca de la pista, colo qu'adelantar según se salga va ser dificil.

Dempués de facer el quintu meyor tiempu na cronometrada del vienres, contábase con qu'Alonso pudiere marcar meyor tiempu, pero amás de los problemes propios, el pilotu de Renault tien esti añu una competencia mui seria colos Bar-Honda y los Toyota, que pasaron de dir a lo cabero del pelotón hasta asitiase esti añu xunta los grandes, una división na que Williams-BMW y, sobremanera, Ferrari, siguen marcando les distancies. Schumacher (Ferrari) Montoya (Williams) y un sorprendente Takuma Sato (BAR-Honda) son los trés pilotos que baxaron del 1,15, mientres que'l Renault de Jarno Trulli abre la riestra de pilotos, del cuartu al décimu, que ficieron tiempos dientro del 1,16, lo que promete muncha igualdá ente ellos con vistes a la carrera