Alonso sigue agrandando la so lleenda al ganar les 24 hores de Daytona

Ye'l tercer campeón de Fórmula 1 que consigue'l trunfu na carrera estauxunidense.

L'equipu Wayne Taylor Racing comandáu por Fernando Alonso a los mandos d'un Cadillac DPi resultó ganador del Rolex 24 at Daytona, prueba conocida de manera popular como les 24 hores de Daytona que tuvo marcada pol agua. Xunto col asturianu, participaron el llocal Jordan Taylor, l'holandés Renger van der Zande y el xaponés Kamui Kobayashi.

Na so segunda participación na carrera del históricu circuitu de Florida –finó nel puestu 38 l'añu pasáu tres sufrir delles averíes– y na so primer competición del 2019, l'uviedín algamó un trunfun qu'agrandez entovía más la so lleenda. El dos veces campeón de Fórmula 1 (2005 y 2006), y tamién vencedor de les 24 Heures du Mans nel 2018, suma al so palmarés una prueba de la que namái pueden presumir otros dos ganadores de la competición por escelencia de velocidá en circuitu: l'estauxunidense Phil Hill, 1964 en Daytona depués de llevar la F1 nel 1961, y l'italianu Mario Andretti nel 1971, que más tarde, nel 1978, sería campeón del mundu de F1.

Nun foi una competición cenciella p'Alonso nin pal restu de pilotos poles males condiciones meteorolóxiques nel Daytona International Speedway. Una bandera collorada pola lluvia intensa y dellos accidentes rexistraos cuando l'asturianu diba líder, a falta de menos 2 hores pal final, paró la carrera, que nun se volvería a poner en marcha, polo que'l Cadilla DPi del Wayne Taylor Racing algama'l trunfu final.

L'oxetivu de la Triple Corona

Tres ganar nes 24 hores de Les Mans y nes de Daytona, l'uviedín va siguir enfotáu n'algamar la Triple Corona, esto ye, vencer na prueba francesa, el Grand Prix de Monaco y la Indy 500, dalgo que namái consiguió l'inglés Graham Hill. Les 500 milles d'Indianapolis van correse'l 26 de mayu.

Na imaxe, Kobayashi, Taylor, Van der Zande y Alson col troféu de campeón del Rolex 24 at Daytona. Semeya propiedá del Wayne Taylor Racing.