Alonso, sestu n'Imola

La fórmula 1 dexó atrás l'allorie de les tres primeres carreres del añu ayeri n'Imola, onde los tres equipos más fuertes del mundial, Ferrari, McLaren Mercedes y Williams BMW mandaron tol tiempu la carrera afitando qu'hai una primer división na que tan estos tres coches y una segunda na que tan tolos demás, que bastante van tener con arrampuñar los puntos que se-yos escapen a los grandes. Con too y con ello, Imola tamién valió p'afitar que nel campeonatu d'esti añu hai lo que se llama un "outsider" un pilotu con un coche ensin el nivel de los grandes pero que ye quien a metese ente ellos, y esi nun ye otru que Fernando Alonso. L'asturianu nun tien los caballos que gasten Schumacher o Raikonen, pero tien arte pa ponese a l'altura d'ellos hasta en circuitos en que'l motor pesa más que toles demás facultaes, casu del circuitu Enzo y Dino Ferrari, onde firmó una sesta posición que lu dexa na cuarta de la xeneral na viéspora de la carrera de Barcelona el 4 de mayu, onde'l públicu asturianu va desplazase en masa a ver al guaje.

Saliendo dende la octava posición, Alonso aprovechó los problemes del Jaguar de Webber na arrancada pa pasalos a elli y a Panis pa mangase na sesta posición, aguantándola a lo llargo de la calma de la carrera más tranquila del añu. un fallu de los mecánicos de Williams al cambia-y una rueda a Montoya permitió al carbayón ganar ventaya abondo como p'aguantar la sesta plaza hasta'l final, anque nes vueltes postreres tuvo d'apretar pa despegase del colombianu. 43 segundo per delantre d'Alonso, Michael Schumacher ganaba per primer vez esti añu, demostrando que l'orde volvió al campeonatu. El líder del mundial inda ye Raikonen, qu'ayeri acabó segundu.