Alonso fizo la pole en Francia

Fernando Alonso valtó tolos pronósticos y marcó, per delantre de Michael Schumacher, el meyor tiempu nos entrenos definitivos pal Gran Premiu de Francia, que se cuerre mañana en circuitu de Magny Cours (Nevers-Francia)

Nuna emocionante sesión d'entrenos na que cada pilotu meyoraba'l rexistru del que saliere primero qu'elli, Fernando Alonso, que salió de los últimos a pista, fizo una vuelta de llibru y aparó'l crono nun tiempu de 1,13,689, el meyor de tola mañana. Namás quedaba por salir el kaiser Schumacher, que tol mundu contaba con que rebaxare'l tiempu del asturianu, y ello paecía llabor fácil. Nel primer tramu de la pista, el Ferrari del alemán allampió-y venti centésimes al tiempu d'Alonso, pero nel segundu parcial el coche encarnáu del campeón del mundu yá marcó cerca d'una décima penriba d'Alonso. Quedaba por vese si l'alemán sedría quien a recuperar la diferiencia nel nel tercer sector de la pista, el más retorcigañáu de tol circuitu, pero en cuenta d'ello, el güecu xubió hasta les 273 milésimes. Nin los McLaren Mercedes de Coulthard y Raikonnen nin el Williams de Montoya foron quien tampoco a allegase a los rexistros del asturianu, que mañana va salir na primer plaza del pelotón por tercer vegada en tola so carrera y por primer ocasión nesti añu 2.004, en que tan faltu de bonos resultaos andaba l'asturianu dempués de les averíes y accidentes de les últimes carreres.

Naide nun contaba con ver al asturianu na pole, y el mesmu Fernando Alonso taba sorprendíu na rueda de prensa de dempués de los entrenos. Con facer una vuelta maxistral, l'asturianu quexóse de que-y esnidiaba'l coche nes curves que se pasen más despacio.
Ver tolos puestos de la parrilla de salida equí