Alonso, contra la barrera en Mónaco

El pilotu asturianu de Fórmula 1 Fernando Alonso nun vio ayeri la bandera de cuadros nel Gran Premiu de Montecarlo. El Renault del asturianu estampó contra les barreres de seguranza cuando adelantaba a Ralf Schumacher (Williams-BMW) que diba con vuelta perdida. L'alemán, en cuenta d'echase pa la parte mala de la pista y dexá-y la trazada bona al asturianu, siguió pela trazada y obligó a Alonso, que circulaba en segunda posición, a adelantalu pela trazada mala del túnel, onde la pista taba mui nidia dempués de trés díes de competición nel circuitu monegascu. El Renault esbarió pelos restos de goma y grasa que taben posaos naquella parte ensin qu'Alonso pudiere controlar el coche, qu'a l a fin pegó cola barrera, perdiendo una rueda nel güelpe. En declaraciones a la prensa dempués de la carrera, Alonso echó lo que quixo pel pequeñu de los hermanos Schumacher.

Foi bona pena l'accidente d'Alonso, porque l'asturianu tenía ayeri un bon tacáu de papeletes p'acabar en podiu y hasta pa ganar la carrera en Montecarlo. Cuando l'accidente, Alonso rodaba en segunda posición a poca distancia del otru Renault de Jarno Trulli, qu'ayeri remató un fin de selmana redondu algamando'l primer trunfu de la so carrera deportiva. Ello yera que faltaben poques vueltes pa entrar a la segunda parada en boxes a echar gasolina, y Alonso quería allegase tolo posible a la culera del coche de Trulli pa ver si yera a ponese delantre d'elli nel baille de los boxes. Empixáu nello, Alonso nun esperó más de lo imprescindible p'adelantar al Williams de Schumacher, que, de cualquier manera, demostró un comportamientu poco deportivu. Tanto, qu'en viendo lo que-y pasare a Alonso, los técnicos d'otros equipos foron dempués a ver a los de Williams pa pidi-yos qu'avisaren al alemán de que s'apartare cuando lu fueren a doblar.

Con too y con ello, en Mónaco hebo más carrera que la d'Alonso, y sobre too, hebo carrera pa la esperanza. Por primer vegada esti añu, Renault demostró que, polo menos en circuitos retorcíos, pue tar per delantre de Ferrari. El trunfu de Trulli foi bona amuesa d'ello nuna carrera en que los coches encarnaos tuvieron la cigua, con Michael Schumacher abandonando tres d'un accidente bien fatu y Barrichello salvando la vergoña del equipu con un tercer puestu a muncha distancia del duu ganador, iguáu por un Trulli fuera de serie y un Jenson Button que demostró ayeri un gran momentu, acorripiando nes vueltes del final al pilotu italianu, que llevaba les cubiertes nos alambres. Namás nueve coches acabaron una carrera que, como tolos años, nun perdona un fallu.