Alonso, a seyes décimes del terceru en Montmeló

El pilotu asturianu del equipu Renault de fórmula 1 completó l'ésitu de los coches franceses nel circuitu de Montmeló al quedar en cuartu puestu tres del so compañeru Jarno Trulli, qu'acompañó en podiu a los dos pilotos de Ferrari, l'equipu a valtar esta temporada.



Fernando Alonso ta avezando a la so afición a malos vicios. Tanto y tan bueno fai'l pilotu asturianu qu'en Montmeló contábase con que diba ganar la carrera de xuro, colo que'l cuartu puestu del final dexó a más d'un malcontentu. Sicasí, nel box de Renault taben pegando saltos d'allegría pol tercer y cuartu puestu de los sos pilotos, que se festeyaron ayeri en Renault como si fueren l'equipu ganador de la carrera.



Y ello ye lóxico, porque per delantre hai dos coches, los Ferrari de Schumacher y Barrichello, que tan a otra competición. Pa tanto ye'l dominiu de los bólidos encarnaos qu'ayeri Schumacher arreglóse pa ganar llevando un tubu d'escape esgonciáu tola carrera, avería que lu obligó a caciplar nel ordenador de xestión del motor p'axustar el funcionamientu de cada bancu de cilindros. Tan fuera del mundu tan los coches coloraos que la carrera de verdá ye por ver quien queda tres d'ellos, y esa carrera ayeri ganóla Renault, que recuperó na carrera d'ayeri'l prestixu qu'amenazaben Bar-Honda y Toyota y acabó col que-y quedaba a Williams. De mano, Trulli, que salía'l cuartu, fizo una arrancada espectacular, mangándose nun primer puestu que valió bonos planos de TV pal equipu los metros en que l'italianu foi a aguantar l'emburrie de los Ferrari, pero tres d'elli, Alonso fizo otra salid
a entovía meyor, como espeyaría dempués la telemetría. Saliendo pelo puerco de la pista, l'asturianu adelantó dos puestos y pudiere guapamente pasar más coches, pero nun había güecu pel que colar el focicu del R24.



La estratexa funcionó mui bien nel equipu Renault, qu'apautó un nuevu récord nel pit-stop con 5,3 segundos pa cambiar cubiertes y echar gasolina, y dempués de la última parada en boxes, Alonso yera cuartu a doce segundos de Trulli. Alonso entamó entós una caza que, a razón de mediu segundu por vuelta, llevólu hasta l'altura de Trulli a trés vueltes del final. L'asturianu quería da-yos una allegría a los de casa, pero pela radio llegó la orde de nun adelantar a Trulli pa nun comprometer un bon resultáu del equipu, entrando los dos coches en meta con 6 décimes de diferencia. Alonso y Trulli tan agora empataos na cuarta plaza del mundial, col inglés Jenson Button a tiru piedra. En cuantes a los Ferrari, qu'entraron a meta con 32 y 19 segundos de ventaya, eso yá ye otru cantar.



La carrera contó cola presencia d'un báramu de seguidores asturianos d'Alonso. Más de 3.000 asturianos pasaron el fin de selmana y montaron una sidrería nel circuitu, valtando, dempués de muncho negociar colos guardes, la norma de la organización de nun meter alcohol en circuitu pa entrar una pipa de 150 llitros que foi pequeña pa la espicha que se fizo. L'afición asturiana tomó'l circuitu, y bona preba d'ello foron con una grada entera pintada d'azul y una bandera d'Asturies de tamañu descomanáu de la peña Fernando Alonso de la Pola Siero que tomaba entera una curva.