Aleguen contra la cantera de la Maruca

El Colectivu Ecoloxista d'Avilés dio anuncia esta mañana de que presentó alegaciones al acta que ta tramitando'l Principáu énte los incumplimientos del plan d'esplotación de la empresa "Canteras la Atalaya" asitiada en La Maruca - Avilés. Los ecoloxistes d'Avilés dicen que la empresa nun ta cumpliendo colo qu'apautare cola Asociación de Vecinos y cola Conseyería d'Industria. Ente los alcuerdos taba'l nun pasar la raya del monte del Picalón, que se perpasó en más de 12 metros. Otru de los alcuerdos yera'l de nun tocar la pantalla d'árboles que guardaba la cantera, un castañéu que perdió bien d'exemplares según avanzaba'l frente de cantera. El remocique del frente de la cantera que da pal este plantando árboles asturianos ye otru de los alcuerdos que nun se cumplieron según los ecoloxistes, lo mesmo que la retirada de la basa de l'antigua balsa de decantación.

El colectivu ecoloxista decidió, en viendo estes irregularidaes, presentase con alegaciones propies pa completar l'espediente qu'a la fin decidió abrir el Principáu contra esta empresa, que ta mercando finques de la rodiada con vistes a una posible ampliación. Con too y con ello, el colectivu ecoloxista d'Avilés llamenta l'abandonu que fai l'Ayuntamientu nestes cuestiones, y ye que'l conceyu nun participó nes visites d'inspección a la cantera y tampoco nun validó cola so firma los alcuerdos ente la empresa y los vecinos.