Alberto Suárez Laso dio a Asturies una medaya d’oru nos Xuegos Paralímpicos de Londres

L’atleta Alberto Suárez Laso (Riosa, 1977) algamó la medaya d’oru na maratón categoría T12, pa persones con deficiencies visuales, y el récor del mundu nos Xuegos Paralímpicos. Trátase de la única medaya asturiana en Londres.

Con un tiempu de 2:24'50" –el récor absolutu, del keniata Patrick Makau ta asitiáu en 2:03'38"–, el de Riosa consiguió rebaxar en 11 segundos la so meyor marca anterior, tamién récord del mundu de la so categoría. Suárez Laso consiguió aventayar en 1 minutu y 49 segundos al colombianu Elkin Alonso Serna, plata; y en 2 minutos y 6 segundos al tunecín Abderrahim Zhiou, bronce. Al concluyir la carrera, l’asturianu, que dominó la mesma dende l’entamu, señaló que medaya d’oru y récor del mundu "ye la combinación perfeuta" y describío la maratón como "mui dura, con xiros y cuestes complicaes". Otra manera, hai que destacar que Suárez Laso tamién algamó un diploma olímpicu al finar sestu nos 5.000 metros.

Los otres trés deportistes asturianos que participaron nos Paralímpicos de Londres, que finaron el domingu, nun pudieron algamar medaya. L’atleta José Manuel González Santamarta ‘Santa’ tuvo que conformase con un diploma olímpicu nos 800 metros gracies a un quintu puestu, al igual que la llevantadora de pesu d’orixe estremeñu Loida Zabala, quinta clasificada n’halterofilia adaptada en menos de 48 quilos. Mentes, el remeru Juan Pablo Barcia, al igual qu’en Beixín, nun tuvo suerte na competición y nun pudo optar a los primeros puestos nos 1.000 metros skiff individual.