Al son del Fueu con Xuacu Amieva

Na mañana del xueves presentóse oficialmente na
Sociedá Xeneral d'Autores d'Uviéu l'últimu discu del
gaiteru Xuacu Amieva.



"Al son del Fueu" ye'l títulu del nuevu trabayu del veteranu
gaiteru Xuacu Amieva, que fai'l
númberu cinco na so carrera en solitario. Dempués de munchos
años como mayestru de gaita, músicu de grupos como
"Ubiña" o "Beleño", sacar dellos
métodos de gaita y cuatro discos en solitario, apaez esti "Al son
del fueu" que ye coherente cola carrera y estilu de Xuacu Amieva.



Editáu por "Piraña Family", esti discu de trece
temes mantién el mesmu estilu de los demás trabayos del
músicu. Una forma de tocar y unes composiciones que tan mui averaes a lo
que ye la música tradicional, que siempre fueron la seña
d'identidá de Xuacu Amieva. Pero nesti discu tamién notamos,
nunos temes más y n'otros menos, la mano del productor musical Xel
Pereda, guitarrista del grupu "Llan de Cubel". La concepción
tan diferente de lo que ye la música folk y de lo que ye la
reinterpretación d'una música tradicional que tienen estos dos
músicos, xuntóse nesti "Al son del fueu", onde la gaita
defende'l so discursu y les cuerdes de Xel Pereda marquen el so espaciu como
acompañamientu de la gaita, que ye como non, instrumentu principal del
discu. Esti discu nun va sonar estrañu pa los siguidores de Xuacu
Amieva, pero con solo escuchar con un poco d'atención notamos que Xuacu
Amieva dio un pasu más na so evolución musical.



La grabación del discu foi bien llarga, añu y picu de
trabayu tien el resultáu qu'agora sala la cai. Grabóse nos
Estudios Mundo Sonoro de Xixón con Xel Pereda como inxenieru de
soníu y productor musical, Olmo Morán técnicu de
soníu. La banda cola que grabó esti discu son Xel Pereda na
guitarra y mandolina, Xavi Méndez col baxu, Fernando Arias nes
percusiones, Ramón Prada nos teclaos, Simón Bradley col
vilgulín, Paula Lueje pal vigulín y la viola y Daniel Lombas nel
bodhrán. Como collaboraciones podemos topar a Yago Prado de
"Llangres", Banda de
gaites Narancu, un cuartetu clásicu de cuerda, la gaitera gallega
Susana Seivane y otros artistes asturianos y foriatos.



Por agora nun ta prevista nenguna presentación oficial del discu
pal públicu, anque Nacho Morán, representante de la
discográfica, quixo apuntar que tan faciéndose les tramites
necesarios pa Xuacu Amieva faiga una xira internacional l'añu qu'entra.