Al menos 23 muertos en trés esplosiones en Bruxeles

Dos tuvieron llugar na terminal de salides del aeropuertu Brussels-National y una nel metru, na estación de Maelbeek.

Cuatro meses depués de los atentaos de París, el terrorismu torna a golpiar a Europa. Nesta ocasión foi la capital belga l'afeutada, con trés esplosiones que terminaron cola vida de 23 persones y un númberu mayor de firíos.

La primer esplosión tuvo llugar poco enantes de les 8, a la que siguió darréu otra, aiciones que según les informaciones que se manexen podríen ser suicides. El númberu de muertos nel únicu aeropuertu comercial de la ciudá sería de trece.

Hora y cuartu más tarde la traxedia aportaba a la estación de Maelbeek, cerca de les instituciones europees. Nesta ocasión, el númberu de finaos ellévase a diez.

Frontera zarrada con Francia

Bélxica afitó'l nivel d'alerta en tol estáu al nivel 4, el máximu nel llugar, y paralizó tolos tresportes públicos. Tamién zarró la frontera con Francia.

José Manuel García Margallo, ministru español d'Asuntos Esteriores y de Cooperación en funciones, señaló al terrorismu islámicu como responsable de los ataques. Apuntó tamién que'l númberu de teléfonu del Consuláu en Bruxeles, onde hai una importante colonia asturiana, ye'l +32 2 509 87 46, anque descartó de momentu la esistencia de víctimes de nacionalidá española.