Aína presenta'l Secretariáu del partíu y pon la mirada nel 2027

La formación celebró la III Asamblea Nacional, na que decidió la so postura con respeutu a les eleiciones al Parllamentu européu.

Aína sigue col so camín d’avanzar pasín a pasu na construcción d’una alternativa política asturianista, d’izquierda y feminista. Magar los contautos fechos con otres organizaciones polítiques de dientro y fuera d’Asturies, la militancia votó por unanimidá nun presentase a la cita eleutoral del 9 de xunu y poner la mirada nes Nacionales del 2027.

D’esta manera'l partíu fundáu l’añu pasáu caltién como les so prioridaes polítiques afondar nel programa políticu; nel discursu y les propuestes series; en fortalecer les distintes estayes de trabayu y les agrupaciones llocales; y en texer redes con otros axentes políticos, sociales y culturales. Too ello da forma a 'Asturies 2027', estratexa pa la qu’Aína tamién estrena tres d’esta asamblea'l so Secretariáu, órganu de direición formáu por dos voceros y dos coordinadores xenerales.

Claudia González (Lluanco, 1999), emigrada esti cursu a Barcelona pa rematar la so formación como música profesional, y Esteban González Corteguera (L’Infiestu, 1984), médicu d’Urxencies na Fundación Hospital de Jove, son los dos portavoces escoyíos pola Mesa Nacional. Mentes, la coordinación xeneral va recayer en manes de Silvia Fernández (Llugones, 1992), emigrada en Madrid onde trabaya como téunica n’igualdá de xéneru, y Marcos Rodríguez (Uviéu, 1989), profesor na Facultá de Formación de Profesoráu de la Universidá d’Uviéu.

"Estes persones representen lo qu’Aína quier reflexar énte la sociedá: xuventú, enerxía, seriedá, asturianismu, feminismu y gana de trabayar pa construyir una Asturies arguyosa de sí mesma y con futuru. Amás, tienen una esperiencia vital y llaboral que conecta cola de munches asturianes y asturianos nacíos yá nel periodu autonómicu: conocen la emigración y la inestabilidá llaboral, la importancia de caltener los servicios públicos, la tresformación del mundu rural y la necesidá de qu’Asturies tenga un proyectu de país", apunten dende la formación asturianista.

Bona participación

Na III Asamblea Nacional, que llevó por nome 'Y toes en movimientu', tamién s’informó de les cuentes del partíu, presentóse la memoria d’actividá de la Mesa Nacional y aprobóse una reestructuración interna "pa facer una organización más eficaz, participativa y ilusionante pa les más de 200 persones –con una media d’edá de 37 años– que yá formen parte d’esti partíu nacíu como respuesta a una sensación d’orfandá política". L'actu, que tuvo llugar el sábadu pela mañana na Casa la Cultura de Llanera en La Estación, contó con una bona participación de militantes.

Na imaxe superior, Fernández, Rodríguez y González Corteguera. A la izquierda, semeya obra d'Iván G. Fernández con González participando en llinia na Asamblea Nacional.