Aína prepara pal Día d’Asturies una xornada d’actividaes baxo’l nome de ‘8S de Soberaníes’

La formación asturianista de creación nueva Aína va arrancar el cursu políticu’l 8 de setiembre con una xornada d’actividaes n’Uviéu, en La Casona de la Montaña, baxo’l nome de ‘8S de Soberaníes’. Una entrevista a David Guardado, una actuación de Nacho Vegas y una xinta de xermandía conformen parte del programa que se ta completando.

Na fecha na que se celebra oficialmente’l Día d’Asturies, Aína prepara una cita política y de xuntanza pa militantes y simpatizantes de la formación. Entovía nun ta zarrada dafechu, pero yá ta confirmada la presencia de Guardado, autor del llibru ‘Nunca vencida. Una historia de la idea d’Asturies’ (La Fabriquina), que va ser entrevistáu sobre esti ensayu, y un conciertu breve de Nacho Vegas.

Tamién va celebrase una intervención política baxo’l nome de ‘Atiendi Asturies’, a la que van siguir actividaes pa la reciella o baille tradicional. D’igual forma los presentes van poder participar nuna xinta de xermandía compuesta por tortiella de pataca, ‘nachos’ con quesu y ‘guacamole’, croquetes de xamón, chorizos a la sidra, deos de pitu, pataques con trés salses y frixuelos, amás de sidra, agua y cerveza, cola posibilidá d’opciones alternatives a la carta.

El preciu de la comida ye de 20 euros y pa participar ye necesario acutar plaza enantes del 3 de setiembre y el pagu, del 6. El programa completu de ‘8S de Soberaníes’ y l’horariu concretu va dase a conocer nos díes próximos, anque la previsión ye la d’entamar pal meudía y pesllar la xornada a media tarde.

Na semeya, un momentu del primer actu políticu d'Aína celebráu en mayu n'Uviéu mientres la campaña eleutoral del 28-M.