Aína pon fecha a la I Asamblea Nacional del partíu, na que va tomar postura de cara a les eleiciones

|
Aína pon fecha a la I Asamblea Nacional del partíu, na que va tomar postura de cara a les eleiciones

La Casa Cultura de Llanera, en Llugo, va acoyer el sábadu 25 la I Asamblea Nacional d’Aína, formación asturianista d’izquierda de creación nueva. Va escoyese la Executiva, Mesa Nacional y Comisión de Control y Garantíes Democrátiques y va aldericase y decidise la postura a tomar de cara a les eleciones convocaes pal 28 de mayu.

El 6 de payares Aína echó a andar cola celebración en Les Vegues del Congresu Fundacional y trés meses depués yá hai fecha pa la I Asamblea Nacional. Un tiempu nel que les 19 persones de la Mesa Nacional provisional vienen dirixendo los primeros pasos pa la organización y llegalización del partíu, y nel que vinieron conformándose les primeres agrupaciones llocales: El Nalón, Xixón, Oriente, El Caudal, Avilés y contorna, Uviéu y El Nora.

Estos primeros pasos desemboquen nesta cita na que los afiliaos d’Aína han afitar les nueves estructures del partíu y tomar decisiones importantes pal futuru de la organización. Asina, de l’Asamblea Nacionald de Llugo va salir la Executiva del partíu, órganu encargáu de dirixir el día a día de la organización; la Mesa Nacional, col encargu de controlar y asesorar l’aición de la Executiva; y de la Comisión de Control y Garantíes Democrátiques, órganu qu’ha mirar pol respetu de los derechos y dignidá de les persones afiliaes.

Hasta’l día 15 ta abiertu’l plazu pa presentar candidatures y pa poder votar ye necesario tar afiliáu al partíu enantes del 20. Mentes, pa participar na I Asamblea Nacional el plazu allárgase hasta’l día enantes de la cita, prevista pa les 9.30 hores.

Tamién va entamase un alderique pa decidir la postura del partíu no tocante a les eleiciones nacionales y conceyiles del 28-M. La Mesa Nacional Provisional ta rematando un documentu d’análisis que quier ser una base pa esti alderique y que va a ser puestu a la disposición de la inscripción próximamente.

Amás d’estos asuntos, presentaráse y someteráse a l’aprobación de la militancia nesta I Asamblea Nacional la Memoria de la Mesa Nacional Provisional y la Ponencia sobre Estayes de Trabayu.

Na semeya, un momentu d'una votación nel Congresu Fundacional d'Aína.

Contador Estadistiques