¿A quien va poner agora'l PP?

Ovidio Sánchez, Gabino de Lorenzo y Mercedes Fernández, son los nomes que más suenen pa sustituyir a Álvarez Cascos na lista del PP asturianu

La dirección el PP asturianu va aconceyar mañana sábadu pa decidir quien va ser el cabeza de la llista popular asturiana al congresu, anque'l nome podría llegar a conocese primero. Ente los nomes que más suenen pa ocupar el puestu que-y correspondía teóricamente a Álvarez Cascos tan el secretariu xeneral del PP asturianu Ovidio Sánchez, la delegada del Gobiernu, Mercedes Fernández o l'alcalde d'Uviéu, Gabino de Lorenzo. Otru posible repuestu a Cascos pue ser el diputáu en congresu Isidro Fernández Rozada, col que yá se contaba de mano pa los primeros puestos de la candidatura.
Tres de la retirada d'Álvarez Cascos los populares asturianos ponen esti fin de selmana cabeza de llista al congresu
Casu d'escoyer a Ovidio Sánchez, esti tendría que renunciar al escañu que tien anguaño na Xunta Xeneral del Principáu y al cargu de senador pola comunidá autónoma. Sánchez salió presidente del PP asturianu tres de la grave crisis de la derecha asturiana nel 99 pola qu'esgayó'l núcleu fundacional de la URAS. Nel 99 Sánchez foi un candidatu de circunstancies que tuvo qu'aguantar un bastiazu electoral bien gordu, pero nes autonómiques del 2003, nes que repitió como candidatu a la presidencia, Sánchez y el PP recuperaron hasta quedar mui cerca del PSOE.

Per otra parte, Mercedes Fernández, persona mui allegada a Álvarez-Cascos, foi delles vegaes candidata a l'alcaldía de Xixón y diputada en congresu hasta recibir el cargu de Delegada de Gobiernu n'Asturies nel 2.000, sustituyendo a Fernando Fernández Noval.

Pela so parte, l'alcalde d'Uviéu Gabino de Lorenzo, qu'estrenó esti añu'l cuartu mandatu por mayoría absoluta na capital, dixo que nun tenía pensao metese en política fuera de lo municipal, anque dende Uviéu suena tamién una de les persones del equipu de Gabino, la antigua conceyala uvieina y actual diputada Alicia Castro Masaveu. Per Xixón, el nome de pilar Fernández pardo tamién ye una posibilidá.