A la venta les entraes pal Conciertu pola Oficialidá

Ya puen mercase les entraes pal conciertu pola Oficialidá d'esti añu.

Ya tan distribuyíes pes Asturies les entraes pa poder entrar al Conciertu Pola Oficialidá. Los puntos de venta son Avilés: Llibrería La Seronda; Café del Duende, Cangas: Penelela, La Felguera: El Llar de Keko, La Pola (L.lena): La Xarrina, La Pola (Siero): Abre Cesar; El Diañu, Mieres: La Buraka, Uviéu: Llibrería Paraxuga; Isla de Cuba, Xixón: Alborá Llibros; Café Trisquel. Les entraes tienen un preciu de 2 euros anticipada y 3 euros na taquilla'l conciertu.

Esti añu hai dellos detalles que faen que pague la pena dir hasta Uviéu esti sábadu. Poder volver a un grupu míticu del folk asturianu como son "Lliberdón", escuchar los nuevos cantares de "Felpeyu", qu'esperen poder sacar el so nuevu discu n'Asturies enantes de qu'acabe esti mes, ver la evolución de grupos que tan llamaos a tener un puestu na escena del rock asturianu como son "Güerku" o poder disfrutar del directo de "Dixebra", que pa esta temporada decidieron volver a tocar temes de discos anteriores al últimu "Sube la Marea", esperando pola publicación esti veranu d'un llibru y un cd que resume la historia del grupu nes dos pasaes décades.

Dos novedaes d'esti añu puen son la presencia de "Oi N'AST¡", y "Dr Xicu". Los primeros practiquen un estilu que nun ye habitual escuchar nesti conciertu, son una banda xixonesa qu'esti añu sacó'l so primer trabayu discográficu con bona acoyía ente los aficionaos al punk-oi. "Dr Xicu" va ser la persona que va encargase de nun dar respiru en tola nueche, esti Dj lleva abondos años pinchando en fiestes, discoteques y festivales dientro y fuera d'Asturies, y esta vegada va enllenar de música esi espaciu de tiempu qu'hai ente grupu y grupu.