A Google quier sali-y competencia

Dempués d'años d'hexemonía del buscador Google, el preséu de busca de datos con más usuarios de tola rede, la competencia quier recuperar puestos y ganar al públicu que perdieron va yá pa cinco años, cuando Google desanició a buscadores como Yahoo, Lycos o Altavista de les barres de preferencia de los internautes. Nesti sentíu, Yahoo yá-y declaró esti mes la guerra a Google, y promete una meyora bultable nel serviciu de busca qu'ufierta. El portal Yahoo, qu'apurre servicios de mensaxería instantánea y corréu ente otros, alquilaba hasta esti mes los servicios del motor Google pal so buscador, pero los responsables de Yahoo entamaron una campaña de meyora col oxetivu de dexar atrás a Google. La marca que pretenden ye la d'indexar los 100.000 millones de documentos de lo que se conoz como "internet fonda" au nun lleguen los deos de Google. Esa "internet fonda" fáenla los billones de documentos enxertos en bases de datos públiques y archivos históricos d'accesu abiertu pero a los que los motores de busca nunca nun se meten. Yahoo va trabayar nesti sentíu cola Universidá de California, La biblioteca del Congresu, la Universidá de Michigan y Proyectu Gutenberg. Con too y con ello, el buscador remocicáu de Yahoo tamién inclúi un sistema d'enxertamentu pagu nos resultaos de la busca que yá tien críticos enantes de que se conoza oficialmente como va funcionar.

D'otra manera, Google nun se da, y cuando Yahoo daba anuncia de la so nueva estratexa, el buscador más solicitáu retrucaba diciendo que taben metiendo meyores nos mecanismos de busca y enxertando un 32% de páxines nueves a la base de datos, que llega agora, según Google, a los 4,4 billones de páxines de los 10 billones que se calcula qu'hai na rede. A la competencia tamién quier amestase un tercer nome: MSN, la filial d'Internet de Microsoft, que gasta anguaño un motor de busca alquiláu y que ta preparando ún propiu. Dizse que en cuantes lu tengan preparáuMicrosoft podría preparar una campaña agresiva pa imponelu a los otros, repitiendo la xugada de cuando'l Internet Explorer desanició al Netscape Navigator nel mercáu de los navegadores