800 ordenadores pa les escueles asturianes

La empresa pública Red.es tien convocáu un concursu empobináu a equipar los colexos asturianos con más de 800 ordenadores. Esti proyectu d´informatización nel sistema educativu tamién afecta a Murcia, Ceuta y Melilla, que xunta Asturies van tener 5.600 ordenadores personales. Esti concursu públicu tien un presupuestu de 3,1 millones d´euros, y xunta elli tamién se convoca un concursu pa caltener les nueves istalaciones informátiques y facer redes inalámbriques Wi-Fi nos colexos algamando un presupuestu total de 3,81 millones d´euros.



Asturies va beneficiase d´esti proyectu cola instalación de 819 PCs, 117 periféricos y 117 redes en 39 colexos asturianos. El presupuestu del programa p´Asturies ye de 820.000 euros, que van dir nos equipos, porque'l sistema operativu va ser el Windows XP de la Conseyería d´Educación. Aparte de que nesta renovación d'equipos nun hai un apueste claru por diversificar los sistemes operativos (el Linux namás va tar presente nos equipos servidores) vese que'l númberu d´equipos ye curtiu dafechu, yá que ye preciso renovar munchos equipos informáticos nel sistema educativu asturianu, que sigue amortizando equipos enforma desfasaos. Otramiente, proyectos como esti deberíen tar acompañaos d´unos planes estables d´alfabetización dixital y d´espardimientu del comerciu electrónicu nel país que valieren pa saca-yos tol partíu a les máquines, y non quedar cenciellamente en facer el gastu nos equipos.