¿8 de setiembre o 25 de mayu pal Día d'Asturies?

|
Semeya Picos pal Día d'Asturies

Dende'l 1978 baraxáronse estes dos feches pa celebrar el Día d'Asturies, optando los políticos finalmente pol festexu relixosu.

El 8 de setiembre, Día de la Nuesa Señora de Cuadonga, o'l 25 de mayu, xornada na que la Xunta Xeneral, convertida en Xunta Suprema, facía la declaración de soberanía y declaraba la guerra a los franceses, foron les dos alternatives valoraes dende los momentos previos a la creación de l'autonomía. L'asturianismu defendía esta segunda pol so significáu y tratase d'una fecha llaica, pero finalmente afitaríase nel 1984 la primera, que venía celebrándose como Día d'Asturies dende'l 1980, col apoyu de socialistes, la derecha y comunistes.

L'historiador Fautino Zapico ye una de les persones que más tien escrito sobre'l 25 de mayu del 1808, con dellos artículos, como'l del que se fixo ecu Asturies.com nel 2013, o 'Cuadonga, 8 de setiembre y nación asturiana' espublizáu nel 8 de setiembre d'esi mesmu añu nesti mediu. D'igual forma, tamién participó en delles charres sobre esta temática, como la que dio nel Espaciu Cultural La Manzorga nel 2014, na que tuvo presente Asturies.com.

Otres figures de la cultura, como Luis Arias Argüelles-Meres, fináu esti añu, tamién defendieron el 25 de mayu como alternativa al 8 de setiembre y "fiesta cívica asturiana". L'escaezu institucional sobre esta fecha caltendríase hasta l'añu pasáu, cuando'l presidente Adrián Barbón avanzó un actu conmemorativu al rodiu d'esta efeméride.

Cumpliría la so pallabra, y esti 25-M l'uvieín Palaciu del Conde de Toreno acoyía un eventu históricu. “Esta conmemoración intenta reparar un escaezu inxustu y enorme”, reconoció'l socialista que, sicasí, defende caltener el 8 de setiembre como fecha de celebración del Día d'Asturies.

 

Contador Estadistiques