49 contaxos diarios de media la selmana pasada

Supón un pequeñu descensu cola anterior.

Sigue la baxada de contaxos, anque esta fin de selmana, con 132 casos detectaos, la cantidá foi superior a la previa, cuando hebo 124. En total, la Conseyería de Salú comunicó 55 el vienres, 37 el sábadu y 40 el domingu.

Nel global de la selmana la cifra, poro, ye menor, con una media diria de 49 casos polos 52 de l'anterior. Arrancó con 51.301 positivos llueu d'una revisión de datos y la cantidá global algamó los 51.645 ayeri, lo que supon un total de 334.

Dende l'entamu de la tercer fola esti datu evolucionó asina: 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84 y 52, hasta los 49 actuales.

3 finaos

La tasa de positividá diaria foi del 3,52 por cientu'l vienres, del 2,99 por cientu'l sábadu y del 2,82 por cientu ayeri. A 7 díes esti porcentaxe, a la espera de los datos oficiales de la COVID-19, taba nun 2,88 por cientu, cuando'l xueves yera del 2,74 por cientu –ayeri quedó nun 2,87 por cientu–.

Estos díes hebo que llamentar 3 muertes, la de trés homes de 65, 65 y 62 años, toes rexistraes ayeri. Llegaben depués de trés xornaes ensin finaos, quedando'l total del andanciu agora en 1.960 –súmase una perda de díes anteriores non contabilizada–.

Tán hospitalizaes 74 persones con confirmación o sospecha de COVID-19, a los qu'hai que sumar otres 34 ingresaes na UCI. Son 9 y 3 menos que'l xueves, de manera respeutiva.

Na semeya, viales de la vacuna 'Comirnaty' de Pfizer/BioNTech qu'aportaron esta mañana a Asturies. Son un total de 36.270 dosis.