46 tonelaes de galipote en 15 díes

La marea prieto del Prestige sigue colingando sobre la costa asturiana mientres la cantidá de galipote que se lleva pañao espoxiga cada día. Según datos oficiales de la Delegación del Gobiernu n'Asturies, dende'l día 1 de xunu llévense pañaos 61.207 kilos de galipote directamente del agua. Son les primeres cifres oficiales dende'l 9 de de xunetu, en que Delegación apurrió'l datu de que se llevaben pañaes dende'l 1 de xunu 14.000 kilos de galipote. En restando dambes cantidaes resulta que la mar dio 46.464 kilos de galipote en 15 díes, una cantidá mui alta que contrasta coles namás 14 tonelaes que se pañaron los 40 díes anteriores. El parte de Delegación fala de manches pequeñes en forma de galleta, pero la cantidá de galipote recoyío concueya colos testimonios de bien de marineros que dicen tener vistes manches más grandes, sobremanera enfrente'l Cabu peñes y Xixón a lo llargo d'esti mes de xunetu

Delegación del Gobiernu dio parte tamién de que-yos dio estos díes un reblagu a los medios humanos y materiales na campaña de retirada del galipote, contratándose a más operarios pa la campaña de tierra, mientres que na campaña de mar hai más barcos de pesca, hasta un total de 30, trabayando na llimpieza, al dicir de les autoridaes "mui satisfactoriamente", operando los más d'ellos na vertical de la Ría del Eo.