2.342 casos esti martes, récor del andanciu

La cifra más alta hasta'l momentu rexistrábase'l miércoles, cuando se comunicaron 2.306.

La Conseyería de Salú comunicó la detección de 2.342 casos de COVID-19 ayeri, récor de tol andanciu, que llega depués de cinco díes de baxada. Hasta la quinta fola la cantidá mayor foron los 808 de la segunda fola, el 13 de payares del 2020, pero nes selmanes últimes, cola llegada d'ómicron, la tresmisión ta siendo mui elevada.

La nota positiva ye qu'esta situación nun ta provocando una presión hospitalaria escesiva, como sí asocedió, por exemplu, na segunda fola. Nel momentu de la hospitalización última había 337 ingresaos, 5 más que'l día anterior, de los 284 tán en planta y 53 na UCI, 2 y 3 más, de manera respeutiva.

Na xornada hebo que llamentar la muerte d'un home de 82 años, la 2.179 del andanciu.

Na semeya, puntu móvil pa facer test d'antíxenos instaláu en Xixón, nel barriu de La Calzada.