20.000 persones acudieron a la vacunación ensin cita

|
Vacunación ensin cita setiembre Campoamor

Esti vienres celébrase otru 'VACFriday'. El miércoles rexistráronse 11 casos nuevos.

Un total de 19.893 persones acudieron a vacunase nes xornaes ensin cita entamaes pol Serviciu de Salú del Principáu d'Asturies (SESPA). Éstes tienen l'oxetivu de facilitar l'accesu al preparáu a la población pendiente d'inmunizar.

Los hospitales de cabecera de cada área sanitaria van acoyer mañana otru 'VACFriday', cola esceición del II y del VI, que van instalar los sos puntos de vacunación nel Palaciu de Deportes de Xixón y nel Centru de Salú de Ribeseya, de manera respeutiva. Los horarios pueden consultase nesti enllaz.

Pequeñu aumentu

A falta de la espublización de los datos oficiales de la COVID-19, la Conseyería de Salú comunicó la detección ayeri de 11 casos nuevos. Son 7 más que'l martes, cuando s'informó de 4.

El SESPA fixo 1.890 pruebes de diagnósticu d'infeición activa, polo que la tasa de positividá s'asitió nel 0,74 por cientu. A 7 díes esti porcentaxe yera enantes de l'actualización del 0,62 por cientu –ayeri baxó al 0,56 por cientu–.

Per quinta xornada nun hebo que llamentar muertes cola enfermedá causada pol coronavirus SARS-CoV-2. Mentes, siguen 6 pacientes ingresaos na UCI, mentes qu'aumenta en 3, hasta los 16, los hospitalizaos en planta con confirmación o sospecha de COVID-19.

Na semeya, xornada de vacunación ensin cita'l mes pasáu na unidá móvil instalada n'Uviéu xunto al Teatru Campoamor.

Contador Estadistiques