20% más de presupuestu pa la Oficina de Política Llingüística nel 2005

La Oficina de Política Llingüística, que nel 2004, primer añu de funcionamientu del organismu, trabayó con un presupuestu de 1.460.000 euros, va tener pal 2005 un presupuestu de 1.740.000 euros (sobre 290 millones de pesetes). Ello supón una xuba de cerca del 20% según apaez nel anteproyectu de Presupuestos Xenerales p'Asturies 2005, que ta entovía pendiente d'aprebase na Xunta Xeneral. Ramón d'Andrés dio p'Asturies.com les sos primeres impresiones acabante de conocer la propuesta final del presupuestu.



El titular de la Oficina de Política Llingüística diz que la xuba ye "apreciable" y "la que cabía esperar dende un puntu de vista realista". Anque reconoz que "nun ye una xuba espectacular" d'Andrés ve na dotación presupuestaria pal 2005 la garantía pa "poder trabayar con un poco más de fuelgu, caltener la Rede de Normalización nos Conceyos y poder abrila a otros conceyos". La política "municipal" ye la prioridá absoluta pa d'Andrés, que sacó otra llectura en positivo d'esti reblagu presupuestariu en cuantes que supón "la garantía del sofitu institucional de la Conseyería al organismu y a la Rede". Pa d'Andrés esta xuba nun cubre toles inversiones previstes en Plan de Normalización, que ta discutiéndose estos meses y que prevé munches más arees d'actuación d'equí al 2007 de les que permite abarcar el presupuestu acabante de conocese, pero ello verase más p'alantre.

Fuera de la cuestíón de los conceyos, d'Andrés adelantó delles llinies de trabayu de la so Oficina nesti 2005, como van ser el replanteamientu de los criterios a les subvenciones a la edición de libros. La idea central pola que va mandase l'alxudicación de les ayudes d'agora en p'alantre va ser que, "independientemente de les perres de que se disponga, estes vayan dafechu a la normalización social".

Pa ello, el Director de la Oficina quier falar coles mesmes editoriales y escuchar les suxerencies qu'estes puedan facer sobre la cuestión, que ye otru de los pegollos de la parte del presupuestu que remana la Oficina.

Con esta xuba presupuestaria pal 2005 que ta acabante de conocese, la cantidá que s'acuta nos presupuestos a la política llingüística allégase, pero nun iguala, el másimu históricu de la llexislatura 95-99, cuando PP y PAS llegaron a firmar nel 99 un presupuestu pa promoción del asturianu por importe de más de 325 millones de pesetes. La entrada del primer gobiernu d'Areces nel 2.000 metió tisoria, y muncha, naquelles cifres, que quedaron en 188 millones de pesetes.