163 profesionales encárguense del rastrexu de contautos estrechos

|
Radar COVID

Salú refuerza l'equipu con 40 más, que se sumen a los 123 que veníen trabayando hasta agora. El llunes rexistráronse 285 casos.

El Serviciu de Vixilancia de Contautos Estrechos ye un sistema flexible y la conseyería dedica más o menos profesionales dependiendo de la situación epidemiolóxica. Hasta agora componíenlu 63 persones, que contaben col sofitu de 60 militares, cantidá qu'agora s'ampliá en 40 hasta los 163.

L'aumentu de positivos nesta selmana última lleva a esta ampliación d'efeutivos. Salú comunicó ayeri 285 casos nuevos de COVID-19 –l'actualización aumenta la cifra hasta 301–, la segunda cantidá más alta dende febreru depués de los 330 del vienres.

El Serviciu de Salú del Principáu d'Asturies (SESPA) fixo 2.829 pruebes de de diagnósticu d'infeición activa, polo que la tasa de positividá s'asitió nel 11,13 por cientu. A 7 díes esti porcentaxe taba'l domingu nel 9,97 por cientu –ayeri xubió al 11,04 por cientu–, cuasi doblando'l 5 por cientu que marca la Organización Mundial de la Salú (OMS) como referencia a partir de la que s'empieza a perder el control de la pandemia.

Sesta xornada ensin finaos

Per sestu día nun hai que llamentar perdes cola enfermedá causada pol coronavirus SARS-CoV-2. Poro, la cifra de finaos nel andanciu caltiénse en 1.980 –una revisión de datos fíxola aumentar hasta 1.981–.

54 pacientes tán hospitalizados con confirmación o sospecha de COVID-19, a los qu'hai que sumar otros 13 pacientes ingresaos na UCI. Son 5 y 1 más que'l domingu, de manera respeutiva.

Na semeya, una persona emplega l'aplicación móvil Radar COVID, que facilita'l llabor d'identificación y trazabilidá de contautos.

Contador Estadistiques