‘La Contraportada’, proyeutu nuevu de periodismu social, va salir a la cai nel mes de setiembre

L’Asociación Ye Too Ponese tien en marcha’l proyeutu ‘La Contraportada’, periódicu asturianu d’información xeneral con un enfoque social que va distribuyise de baldre a partir de setiembre. La llingua asturiana va tener sitiu nesta publicación.
 
Esta iniciativa, financiada pola Axencia Asturiana de Cooperación Internacional, al traviés del programa d’Educación pal Desarrollu, tien como oxetivu “averar a la población les noticias con un enfoque diferente, más centráu nel empoderamientu de les persones, la capacidá de participación y aición, la igualdá de muyeres y homes, el desarrollu sostenible, les causas reales de las desigualdades… Too ello ensin renunciar a los principios básicos del periodismu nin a la collaboración de les y los llectores en buscar alternatives y propuestes”, espliquen dende Ye Too Ponese. Alredor d’una docena de persones tán trabayando nestos momentos na ellaboración del númberu ún de ‘La Contraportada’, que va asoleyase nel mes de setiembre.
 
Anque la publicación va tar escrita en castellanu, la llingua asturiana tamién va tener un güecu. “Ye dalgo que tovía nun tratamos nel conseyu editorial, pero la idea yera tornar al asturianu dalgunes páxines, pa lo que vamos pidir la collaboración de dalguna persona que nos ayude nesi sen”, señala Jose Vázquez, coordinador del proyeutu. La periodicidá de ‘La Contraportada’ va ser bimensual y ésta va repartise de baldre na cai, en biblioteques y oficines de mocedá, ente otros munchos puntos, cola intención principal “de llegar a la xente mozo”, afirma Vázquez. L’Asociación Ye Too Ponese vien trabayando dende’l 2004 col envís de favorecer la participación ciudadana, tanto de neños y neñes, como de mozos, adultos y mayores.