Ḷḷena vive unes xornaes festives que van tener la música n’asturianu como protagonista

Ḷḷena ta en fiestes y la música n’asturianu va tar presente. Dixebra, Toli Morilla, La Coḷḷa Propinde, Fala non Caduca o Skama la Rede son dalgunes de les actuaciones que tán previstes estos díes en La Pola, que ta viviendo La Flor.
 
El barriu La Caleya va acoyer el sábadu y el domingu el VIII Mercáu Tradicional La Flor de Ḷḷena, qu’entama la Xunta Cultural Rebelgu y que va reunir a 52 artesanos estos dos díes. Amás, va contar nun escenariu onde van pasar dellos grupos de primer nivel na escena asturiana y Brutus’ Daughters, grupu de punk-folk de Carabanchel. Na primer xornada ta prevista l’actuación, a partir de les 20 hores, de La Coḷḷa Propinde, Skama la Rede, Fala non Caduca y Dixebra. Mentes, el domingu, va ser el turnu de Toli Morilla, Brutus’ Daughters y Spanta la Xente a partir de les 19 hores.
 
Nun va ser la única actividá que va poder disfrutase estos díes en La Pola, que vive les Fiestes de La Flor hasta’l martes. Ente elles destaca la celebración del venti aniversariu de la Banda de Gaites Güestia, programada pal sábadu a les 18 hores, que va consistir nun pasucais pela villa nel que tamién van participar la Banda de Gaitas Catalmibre (Galicia) y el Grupo de Baiḷḷe La Flor de Xanzaina. Nun ye l’únicu aniversariu a festexar, yá que la Agrupación Coral La Flor cumple 60 años y va ufrir una actuación nel Teatru Vital Aza (19.30 hores) xunto col Orfeón Arandino (Aranda de Duero).
 
Nestos díes tamién va poder disfrutase d’actuaciones d’orquestes, obres teatrales, caballitos, deporte y esposiciones, ente otros. Unes fiestes mui prestoses que tienen el so momentu más esperáu’l llunes cola la romería nel prau de La Flor. Otra manera, les actividaes en Ḷḷena van continuar los díes 3, 4, 5 y 6 de mayu cola V Semana Pola Salú ‘Xente sana nun mundu sanu’, que va contar con charres y talleres alredor de la salú.