El Bloque solicita un Plenu en Samartín sobre la incineradora

El conceyal del Bloque por Asturies en Samartín del Rei Aurelio, Manuel Benayas Bode, solicitó un Plenu estraordinariu p'aldericar la construcción d'una incineradora en Serín.

Benayas solicitó un Plenu pola xunta xeneral de Coxersa, na que’l conceyu de Samartín tien dos representantes, el próximu día 26 d'esti mes, na cual va decidise la construcción o non d'una incineradora como solución a la problemática del tratamientu de basoria.

La fecha afitada pa la celebración del Plenu ordinariu ye'l día 28, “colo cual va facese imposible esa toma de posición municipal enantes de la xunta de Coxersa, solicitamos al Sr. Alcalde, tenga a bien convocar un Plenu Estraordinariu nel que como únicu puntu del Orde del día, o a lo menos figurando nél, conste'l sofitu o refugu del nuesu Conceyu a la construcción de la incineradora”.
 
El Bloque considera que la postura a treslladar polos representantes municipales a dicha xunta tien que ser sometida al alderique democráticu de los representantes llegales del conxuntu de la ciudadanía de Samartín, “de tala manera que quede clara la responsabilidá y posición de cada conceyal, lo mesmo que de los distintos Grupos Municipales de sofitar o refugar la incineradora”.
 
Amás, mañana, miércoles a les 12 hores, el Bloque por Asturies va repartir cartafueyos en contra de la incineradora nel mercáu de L´Entregu. Ente los presentes van tar el conceyal de Samartín del Rei Aurelio, Manuel Benayas Bode, el conceyal de Llangréu, Gustavo Álvarez Tuya, el conceyal de Gozón y Voceru Nacional del Bloque, Pablo Fernández, como militantes de la organización.