UNA va solicitar al Plenu del Conceyu que debata sobre'l “casu Juliana”

UNA va presentar una solicitú al Conceyu pa que se debata en Plenu'l “casu Juliana” y s'esplique a los ciudadanos “por qué s'invierte'l dineru público en pesllar el sector naval”.

La vocera d'UNA-Xixón, Yolanda González, dixo que gasten más de 150 millones d'euros en pesllar el sector naval públicu de la ciudá y que si Principáu y Pymar tienen argumentos pa facer lo que fixeron que “el Conceyu les esplique, porque queremos suponer que nun lo dexaron si nun ye con razones de pesu y yá ye hora que les conozamos”.

Según Yolanda González, ye increíble que “la carga de trabayu de Juliana tea xenerando en Vigo y Santander más puestos de trabayu que la regasificadora ya incineradora xuntes” y entrúgase si los conceyales de Xixón “tán daveres defendiendo los intereses de los y les trabayadores de la ciudá y Asturies”.
 
Dende UNA denuncien que nun se puen gastar más de 150 millones d'euros en pesllar el sector naval ensin dar esplicaciones, más cuando la carga de trabayu ta dexando'l desenvolvimientu d'esi sector n'otres partes del Estáu y supónse que la inversión faise n'Asturies, colo que 150 millones d'inversión n’Asturies, realmente ta xenerando bayura fuera” lo que Yolanda González califica de “insultu a los xixoneses en particular y a tolos asturianos en xeneral”
 
Pa cabu UNA amosó’l sofitu a la movilización contra'l piesllu del sector naval públicu en Xixón que va tener llugar el viniente 22 d'abril en Xixón, “porque tanto dende l'ámbitu políticu como sindical, tenemos que lluchar pa qu'esta mena d'actuaciones nun puedan llevase alantre” concluyó Yolanda Gónzalez.