83.606 desemplegaos en marzu

El paru baxó n'Asturies el pasáu marzu en 130 persones, un descensu del 0,16 por cientu en relación a febreru d'esti añu, colo que la cifra total de paraos na rexón queda en 83.606.

En comparanza col mesmu mes del 2009, la subida del númberu de paraos ye del 12,40 por cientu, al incorporase a les oficines de los servicios públicos d'emplegu 9.225 persones nel últimu añu, según datos publicaos güei pol Ministeriu de Trabayu y Inmigración.

A nivel nacional el númberu de paraos rexistraos nes oficines de los servicios públicos d'emplegu subió en 35.988 persones en marzu, un 0,9 por cientu al respecto de febreru, colo que'l volume total de paraos quedó en 4.166.613 persones, el so nivel más altu en tola serie histórica comparable, qu'entama en 1996.
 
Sectores
  
De los 83.606 paraos asturianos contabilizaos al acabar el pasáu mes, 53.463 pertenecen al sector servicios, siguíu de la construcción (13.467), la industria (9.307), el colectivu sin emplegu anterior (6.452), y l'agricultura, con 917 paraos.
 
Sexu, edá y estranxeros
  
El paru n'Asturies afecta a 39.572 homes y a 44.034 muyeres. Esti desemplegu afecta a 9.550 menores de 25 años, 5.430 homes y 4.120 muyeres.
  
No referente a la población estranxera, al acabar marzu había n'Asturies 5.812 paraos, 53 más qu'en febreru (+0,92%) y 1.246 más que va un añu (+27,2%). D'ellos, la mayoría vienen de países estracomunitarios (3.714), mientres que los 2.098 restantes son de la Unión Europea.
 
Contratos
  
No que se refier a la contratación, en marzu robláronse n'Asturies 22.227 contratos, 5.505 más que nel mesmu mes de 2009 (+32,92%, el doble que la medría de la media española, que foi del 15,67%).
  
Si se compara con marzu del 2009, la subida ye inferior, del 21,92 por cientu, dao qu'en términos interañales hubo 3.996 contratos más. En tol país, esti repique foi del 12,08 por cientu.
  
Los contratos temporales firmaos fueron 20.133, mientres que los 2.094 restantes fueron indefiníos.