El tresporte escolar anuncia la suspensión de servicios

Les patronales de tresporte de viaxeros Asetra, Asvipmet y CAR, decidiero tres un conceyu calteníu güei, la suspensión de servicios de tresporte escolar a partir de mañana.

Xustificaron la midida énte'l "imcumplimientu" per parte de la Conseyería d'Educación y Ciencia del alcuerdu pol que se comprometía a aplicar a partir de setiembre del 2008 una subida sobre'l preciu de los contratos de tresporte escolar.

Según señalaron les patronales al traviés d'una nota de prensa, depués de más d'añu y mediu reclamando una reunión pa tratar l'asuntu, el pasáu 17 de marzu la Direutora Xeneral de Planificación treslladó a les asociaciones la imposibilidá de que la Conseyería d'Educación cumpla col compromisu mercáu, polo que les empreses siéntense "engañaes". Nesa mesma reunión les patronales informaron de la imposibilidá d'emprestar los servicios tres les vacaciones de Selmana Santa si nun se facía efectivu l'alcuerdu antes d'esa fecha.

El pasáu miércoles día 31 de marzu, recibieron una convocatoria d'aconceyamientu pal xueves día 8 d'abril. Les patronales contestaron de forma inmediata a dicha convocatoria entendiendo que la xunta tenía que celebrase necesariamente antes de la continuación de les clases, "ensin que se recibiera contestación alguna per parte de la Conseyería d'Educación, nun claru intentu de retrasar la solución d'un conflictu que yá vien de lloñe".
  
Les empreses ven "chocante" que dende'l Gobiernu del Principáu apélese a la responsabilidá de les empreses transportistes y a la necesidá de retomar la vía del diálogu, cuando foi la mesma Conseyería la que llevó a esta situación, "incumpliendo los acuerdos algamaos y tratando permanentemente de retrasar la solución del conflictu".
  
"Nel contestu económicu actual, con una clara subida de los costos sociales y del preciu del gasóil, esti incumplimientu per parte de l'alministración fai imposible que les empreses puean realizar los servicios de tresporte escolar a partir de mañana martes 6 d'abril, situación que se va aplazar hasta que la Conseyería cumpla lo pautao", acabaron.
  
A lo último, pidieron disculpes a los padres poles molesties causaes, insistiendo en que la solución d'esti conflictu ta en manes de la Conseyería d'Educación.