Sinde diz que'l so compromisu col prerrománicu asturianu ye "firme"

La ministra de Cultura aseguró güei n'Uviéu que'l compromisu del Ministeriu col Arte Asturianu, ye firme y constante. Tamién dixo que la disposición anti-piratería ta n'orde

En declaraciones a los medios en participando na inauguración del Archivu Históricu d'Asturies, González Sinde esplicó qu'una prueba d'esi compromisu col prerrománicu asturianu, “un patrimoniu de toos”, ye que "mui pronto" va roblase'l conveniu que va permitir inversiones de 1,2 millones "a pesar de la crisis".
 
Pela so parte el presidente del Principáu, Vicente Álvarez Areces, dixo que se desarrollaron actuaciones permanentes pero agora "ye la primer vegada que se llogró poner d'acuerdu a toles partes implicaes, esto ye a los Gobiernos rexonal, central, local y la mesma Ilesia". "Esti añu, nun añu de crisis dedícase 1,2 millones d'euros al Prerrománicu y eso ye lo qu'hai", dixo Areces.
 
Mientres, que’l conceyal de Cultura d'Uviéu, José Suárez Arias- Cachero, calificó en rueda de prensa de "vergonzoso" que'l Ministeriu de Cultura "pretenda tener protagonismu" nel prerrománicu asturianu con una aportación de 390.000 euros.
 
Cachero dixo que l'actual situación del prerrománicu "pol que nun se fai nada", débese a la so triple condición de "asturianu, especialmente uvieín, y fundamentalmente formáu por ilesies", algo que, según manifestó, "empapiza" al PSOE.

Apoyu a la disposición anti-pirateria
 
La Ministra de Cultura, tamién dixo n'Uviéu que la disposición adicional contra la piratería, "va dir al Congresu como ta previsto" porque "ye una midida mui informada polos órganos consultivos y ta too n'orde".
 
L'anteproyeutu de la Llei d'Economía Sostenible aprobáu pol Gobiernu prevé un sistema mistu pa decidir sobre'l zarru de webs nel que van intervenir una comisión de Propiedá Intelectual y l'Audiencia Nacional. El Gobiernu dio lluz verde a la tramitación del testu de les descargues illegales depués de conocer los informes de diverses instituciones consultives qu'informaron sobre'l testu de la disposición adicional.
 
La Ministra, preguntada pol discutiniu orixináu na rede, manifestó qu'internet y la dixitalización ye bien importante pa los ciudadanos y fundamental pal so futuru. "La dixitalización, l'espardimientu y l'accesu a la cultura ye parte de la vida de cualquier ciudadanu de manera que ye natural que se produzan discutinios", dixo González Sinde.
 
Nesti sen afirmó que va llegar un momentu nel que toos vamos tener igual a accesu a la cultura, pero mentanto'l Gobiernu tien la obligación de facer compatibles los drechos de toos, sobremanera col fin, que ye nun dexar de tener patrimoniu cultural na rede.