Areces pide unidá a les fuerces sociales p'algamar "lo qu'Asturies se merez"

|

El presidente del Principáu, Vicente Álvarez Areces, pidió güei unidá a les fuerces sociales y polítiques de la rexón p'algamar "lo qu'Asturies se merez" en cuanto al nuevu modelu de financiación autonómica que se ta negociando. Asina lo fizo demientres la so intervención nel actu d'entamu a les obres del futuru Palaciu de Xusticia de Xixón, onde mostró la so confianza na negociación y en qu'Asturies "meyore claramente les sos posiciones" col nuevu sistema de financiación que s'aplique.

Nesti sen, recordó qu'anque Asturies nun creció muncho en población, deben tenese en cuenta los criterios d'avieyamientu y d'espardimientu de la población, que conlleven un mayor gastu. Tamién señaló que nun s'algamó tovía la converxencia europea, pese a que se trabayó "muncho", polo que ye necesario recibir ayudes.

El xefe del Executivu rexonal aseguró que'l so compromisu ye "velar pol interés d'Asturies y los asturianos", y añadió que'l Principáu sólo va dar la so aprobación al nuevu modelu de financiación cuando vea que con ello Asturies pue meyorar. "Asturies supo defender los sos interes", añadió.

Per otru llau, aludió a la votación mañana de los Presupuestos rexonal pal 2009, nos que se contempla una incentivación de la inversión pública como midida p'amenorgar la crisis. "Una vieya receta que sigue siendo válida", añadió. Sobre la crisis, indicó que los gobiernos democráticos van dar una eficaz "respuesta".

Según el presidente rexonal, con estos Presupuestos va fortalecese la capacidá de la economía de cara a evitar un aumentu mayor del desemplegu y de forma que se favoreza la proteición social. Areces afirmó que la pallabra crisis nun los asusta y aludió a la "voluntá colectiva", a la "intelixencia política" y a la "inmigración" pa face-y frente, too ello unío a los recursos de los que se dispón.

Contador Estadistiques